Maharashtra Breaking News Highlights : “दोन्ही पवार एकत्र येण्यास अजित पवार गटातील दोन नेत्यांचा विरोध”, राऊतांनी नावं आणि कारणही सांगितलं

कोल्हापूरमधील गोकुळ दूधसंघाच्या चेअरमनपदी वैद्यकीय शिक्षणमंत्री हसन मुश्रीफ यांचे चिरंजीव नाविद यांची निवड झाली आहे. अध्यक्षांची निवड करण्यासाठी सकाळी १० वाजल्यापासून कोल्हापुरात राजकीय खलबतं चालू होती. मंत्री हसन मुश्रीफ यांनी व महायुतीने जोरदार मोर्चेबांधणी केली होती. त्यास यश मिळालं असून नाविद मुश्रीफ यांची गोकुळच्या अध्यक्षपदी निवड झाली आहे.

सामाजिक न्याय मंत्री तथा शिवसेना (शिंदे) नेते संजय शिरसाठ म्हणाले, "राष्ट्रवादी काँग्रेस पार्टी शरदचंद्र पवार पक्षाचे प्रदेशाध्यक्ष जयंत पाटील यांचं त्या पक्षात मन लागत नाही. तसेच एक गट पक्षात त्यांच्याविरोधात सक्रीय आहे हे संपूर्ण महाराष्ट्राला माहिती आहे. त्यामुळे जयंत पाटील फार दिवस तिथे राहतील असं वाटत नाही.सर्वांनाच याबाबत शंका वाटतेय. शरद पवार गटात मोठी अस्थिरता आहे. त्या पक्षातील काही जण म्हणतात युती करायची, तर काहींचा युतीला विरोध आहे, तर काही जण पदांसाठी भांडत आहेत. त्या पक्षात सगळा गोंधळ माजलाय. पक्षात लवकर महत्त्वाचे निर्णय झाले नाहीतर तर शरद पवारांचा पक्ष फुटायच्या मार्गावर आहे".

शिवसेना (ठाकरे) खासदार संजय राऊत म्हणाले, "मुख्यमंत्री देवेंद्र फडणवीस व उपमुख्यमंत्री अजित पवार यांच्यात विसंवाद आहे, कम्युनिकेश गॅप आहे. तर शिंदे व अजित पवारांमधून विस्तव जात नाही, हे देखील सर्वांना माहिती आहे. अशा परिस्थितीत एकनाथ शिंदे हे स्वतंत्र बेटावर उभे आहेत. अजित पवार दुसऱ्या टोकाला आणि फडणवीस तिसऱ्या टोकाला उभे आहेत, तरी देखील ही महायुती आहे. मात्र, एकनाथ शिदे आमच्याकडे होते तेव्हा त्यांचा उद्धव ठाकरेंशी संवाद पक्का होता. आता ते कोमात का गेले आहेत त्याचा तपास फडणवीसांनी केला पाहिजे".