Maharashtra News Highlights: महापालिकेच्या निवडणुका राष्ट्रवादी स्वबळावर लढवणार का? भुजबळ म्हणाले, “या निवडणुका कार्यकर्त्यांच्या…”

शिवसेनेचे (ठाकरे) खासदार व प्रवक्ते संजय राऊत यांच्या ‘नरकातला स्वर्ग’ या पुस्तकाचं उद्या (शनिवार, १७ मे) मुंबईत प्रकाशन होणार आहे. ज्येष्ठ साहित्यिक व चित्रपट पटकथालेखक जावेद अख्तर यांच्या हस्ते या पुस्तकाचं प्रकाशन केलं जाणार आहे. शिवसेना (ठाकरे) पक्षाचे प्रमुख उद्धव ठाकरे, राष्ट्रवादी काँग्रेस पार्टी शरदचंद्र पवार या पक्षाचे प्रमुख तथा ज्येष्ठ नेते शरद पवार व तृणमूल काँग्रेसचे खासदार साकेत गोखले यांच्या उपस्थितीत हे पुस्तक प्रकाशित केलं जाईल. या पुस्तकाच्या प्रकाशनापूर्वीच यामधील मजकूरावरून, राऊतांनी केलेल्या काही दाव्यांवरून मोठा राजकीय गोंधळ सुरू झाला आहे. यावर वेगवेगळ्या राजकीय प्रतिक्रिया देखील येत आहेत. दरम्यान, प्रसारमध्यमांच्या प्रतिनिधिंनी या पुस्तकातील मजकुराबाबत राज्याचे मुख्यमंत्री देवेंद्र फडणवीस यांच्याकडे प्रतिक्रिया विचारली असता, “मी बालवाङ्मय (बालसाहित्य) वाचत नाही”, अशी खोचक टिप्पणी केली.

वाचा सविस्तर

स्थानिक स्वराज्य संस्थांच्या निवडणुका स्वबळावर लढवाव्यात असा नारा महायुतीतील पक्षामधून दिला जात आहे. मग याबाबत राष्ट्रवादी काँग्रेस अजित पवार पक्षाची नेमकी भूमिका काय आहे? असा प्रश्न विचारला असता छगन भुजबळ म्हणाले की, “याबाबत मुख्यमंत्री देवेंद्र फडणवीस यांनी उत्तर दिलेलं आहे. त्यांनी सांगितलेलं आहे की स्थानिक स्वराज्य संस्थांच्या निवडणुका आम्ही एकत्रित लढणार आहोत. पण या निवडणुका कार्यकर्त्यांच्या असल्यामुळे काही ठिकाणी वेगळ्या निवडणुका लढू शकतात”, असं छगन भुजबळ यांनी म्हटलं.

सरकारी नोकऱ्या आणि शैक्षणिक संस्थांमध्ये मराठा समाजाला आरक्षण देण्याच्या राज्य सरकारच्या निर्णयाला आव्हान देणाऱ्या याचिकांवर सुनावणी घेण्यासाठी न्यायमूर्ती रवींद्र घुगे, न्यायमूर्ती संदीप मारणे आणि न्यायमूर्ती निजामुद्दीन जमादार यांचे विशेष पूर्णपीठ स्थापन करण्यात आले आहे. सरन्यायाधीश भूषण गवई यांच्या अध्यक्षतेखालील सर्वोच्च न्यायालयाच्या खंडपीठाने याबाबत आदेश दिल्यानंतर उच्च न्यायालयाचे न्यायमूर्ती आलोक आराधे यांनी मराठा आरक्षणाच्या याचिकांवरील सुनावणीसाठी विशेष खंडपीठ स्थापन केले.

सविस्तर वाचा

"संजय राऊत काय बोलतात हे कोणी ऐकत देखील नाही आणि त्यांच्याबाबत कोणी काही बोलत देखील नाही. ते वाट्टेल ती बडबड करत असतात. भारत-पाकिस्तान तणावादरम्यान पंतप्रधान नरेंद्र मोदी आणि अमित शाह यांनी राजीनामा द्यावा असंही ते म्हणाले होते. मात्र, आता संजय राऊत यांना कोणीही गांभीर्याने घेत नाही. त्यामुळे त्यांच्यावर काही न बोललेलं बरं", असं म्हणत गिरीश महाजन यांनी संजय राऊत यांच्यावर टीका केली.