पंढरपूर : कार्तिकी यात्रा कालावधीत श्री विठ्ठल रुक्मिणी मातेच्या दर्शनासाठी राज्यातील विविध जिल्ह्यांतून तसेच परराज्यातून मोठ्या प्रमाणात भाविक येतात. यात्रा कालावधीत चंद्रभागा नदीच्या पैलतीरावरील ६५ एकर (भक्ती सागर), चंद्रभागा नदी पात्र, दर्शन रांग, प्रदक्षिणा मार्ग व परिसर येथे मोठ्या प्रमाणावर भाविकांची असते.
यात्रेत भाविकांच्या सुरक्षेला प्राधान्य देवून गर्दी व्यवस्थापना बाबत सूक्ष्म नियोजन करावे. तसेच भाविकांच्या आरोग्य सुविधेसह स्वच्छतेला प्राधान्य देवून आवश्यक उपाययोजना कराव्यात, अशा सूचना प्रांताधिकारी सचिन इथापे यांनी दिल्या. दरम्यान, कार्तिकी एकादशी २ नोव्हेबर रोजी आहे.
कार्तिकी यात्रा नियोजनाबाबत येथील प्रांत कार्यालय येथे बैठकीचे आयोजन करण्यात आले होते. या बैठकीस उपविभागीय पोलीस अधिकारी प्रशांत डगळे, मंदिर समितीचे कार्यकारी अधिकारी राजेंद्र शेळके, कार्यकारी अभियंता अमित निमकर, तहसीलदार सचिन लंगुटे, गटविकास अधिकारी अमोल जाधव, मुख्याधिकारी महेश रोकडे, तालुका आरोग्य अधिकारी डॉ. एकनाथ बोधले, उपजिल्हा रुग्णालयाचे वैद्यकीय अधिक्षक डॉ. दीपक धोत्रे यांसह संबंधित विभागाचे विभाग प्रमुख उपस्थित होते.
यावेळी बोलताना प्रांताधिकारी इथापे म्हणाले, यात्रा कालावधीत भाविकांच्या सुविधेबाबत नगर पालिका व मंदिर प्रशासनाची जबाबदारी आहे. या कालावधीत नगरपालिकेने स्वच्छ पिण्याच्या पाण्याचा मुबलक पाणी पुरवठा करावा, वाळवंटातील तसेच शहरातील अतिक्रमणे काढावीत. वाळवंटात पुरेशा प्रकाश राहिल याबाबत नियोजन करावे, धोकादायक इमारतींवर ठळक सूचना फलक लावावेत, मोकाट जनावरांचा बंदोबस्त करावा.
मंदिर समितीने व नगरपालिकेने प्रदक्षिणा मार्ग, नदीपात्रात आवश्यक ठिकाणी बॅरेकेटींग करावे व अग्निशामक यंत्रणा कार्यरत ठेवावी. कार्तिकी यात्रा कालावधीत समितीने जादाचे पत्राशेड, जर्मन हॅगर उभारावेत, दर्शन रांगेत ठिकठिकाणी सूचना फलक लावावेत. विद्युत रोषणाईचे फायर ऑडीट व स्काय वॉकचे स्ट्रॅक्चरल ऑडीट करून घ्यावे.
राष्ट्रीय महामार्ग प्राधिकरणाने कामे करावीत, चंद्रभागा बसस्थानकात बससाठी रस्ता करावा. एसटी महामंडळाने प्रवाशी वाहतुकीचे नियोजन करून बसस्थानकावर आवश्यक सुविधा उपलब्ध कराव्यात. कार्तिक यात्रा कालावधीत वाखरी येथे जनावरांचा बाजार मोठ्या प्रमाणावर भरत असल्याने पशुसंवर्धन विभागाने पशुवैद्यकीय पथकाची नेमणूक करावी.
तसेच विभागाने जनावरांच्या व पशुपालकांच्या पिण्याच्या पाण्याची व्यवस्था करावी. अन्न व औषध प्रशासनाने शहर व परिसरातील खाद्यपदार्थांच्या दुकानांची तपासणी करावी, अशा सूचनाही प्रांताधिकारी इथापे यांनी दिल्या.
