सातारा : शेतकऱ्यांची फसवणूक करून नेलेले तब्बल ६५ लाख रुपये किमतीचे दोन ट्रॅक्टर व एक पोकलेन यंत्र जप्त करण्यात फलटण शहर पोलिसांना यश आले. कर्नाटकातील आंतरराज्य टोळीतील दोन संशयितांना अटक करून त्यांच्याकडून मुद्देमाल हस्तगत करण्यात आल्याची माहिती पोलीस निरीक्षक हेमंतकुमार शहा यांनी दिली.
याबाबत फलटण शहर पोलीस ठाण्यातून मिळालेली अधिक माहिती अशी, फलटण तालुक्यातील शेतकरी विनय संपत माने यांनी फेसबुकवर ट्रॅक्टर भाड्याने देण्याची जाहिरात केली होती. त्यावर कर्नाटकातील मुस्ताक मोहम्मद हुसेन या इसमाने राष्ट्रीय महामार्गाचे सरकारी काम असल्याचे सांगून दोन ट्रॅक्टर व एक पोकलेन भाड्याने घेतले. मात्र, करारानुसार भाडे न देता मोबाइल बंद केला आणि कामाचे खोटे आदेश (वर्क ऑर्डर) दाखवून ट्रॅक्टर व मशिन कर्नाटकमध्ये नेऊन विक्री केली. तक्रारीनंतर फलटण शहर पोलिसांनी सखोल तपास सुरू केला.
संशयितांचा माग काढत पोलिसांनी महाराष्ट्र, कर्नाटक आणि मुंबईपर्यंत शोध घेतला. शेवटी मुस्ताक मोहम्मद हुसेन याला मुंबईतून तर त्याचा साथीदार इदमा हबीब रेहमान कुंजी बिहारी याला कर्नाटकातून अटक करण्यात आली. तपासात ही टोळी शेतकऱ्यांना खोट्या सरकारी वर्क ऑर्डर दाखवून ट्रक, पोकलेनसारख्या यंत्रसामग्रीची फसवणूक करून ती दुसऱ्या राज्यात विकत असल्याचे उघडकीस आले.
कारवाईत दोन ट्रॅक्टर व पोकलेन असा ६५ लाख रुपयांचा मुद्देमाल जप्त करण्यात आला आहे. ही धडक कामगिरी पोलीस अधीक्षक तुषार दोशी, अपर पोलीस अधीक्षक वैशाली कडुकर, उपविभागीय अधिकारी विशाल खांबे यांच्या मार्गदर्शनाखाली पोलीस निरीक्षक हेमंतकुमार शहा, उपनिरीक्षक विजयमाला गाजरे, सहायक उपनिरीक्षक संतोष कदम, अंमलदार पूनम बोबडे, काकासाहेब कर्णे, अतुल बडे व जितेंद्र टिके यांनी केली.
