Sanjay Raut on MNS Shivsena UBT Victory Rally : प्राथमिक शाळांमधील हिंदी भाषेची सक्ती आणि त्रिभाषा सूत्र लागू करण्याचे दोन शासकीय आदेश रद्द करण्याच्या महायुती सरकारच्या निर्णयावर जल्लोष करण्यासाठी शिवसेना (ठाकरे) व मनसेच्या वतीने आज (५ जुलै) विजयी मेळाव्याचं आयोजन करण्यात आले आहे. वरळीतील (मुंबई) एनएससीआय डोम येथे हा मेळावा पार पडणार असून यानिमित्त तब्बल दोन दशकानंतर ठाकरे बंधू (राज व उद्धव ठाकरे) एकाच मंचावर एकत्र येत आहेत.

हा विजयी मेळावा कसा असेल? कार्यक्रमाची रुपरेषा कशी असेल? या कार्यक्रमाला राज व उद्धव ठाकरे यांच्याशिवाय इतर कोणकोणते नेते उपस्थित असणार आहेत? असे प्रश्न सर्वांना पडले आहेत. दरम्यान, शिवसेनेचे (ठाकरे) खासदार संजय राऊत यांनी या प्रश्नांची उत्तरं दिली आहेत.

हेही वाचा

खासदार संजय राऊत म्हणाले, “हा विजयी मेळावा म्हणजे काही ठरवून केलेला कार्यक्रम नाही. आमचा सरकारशी संघर्ष झाला आणि सरकारने हिंदी भाषेच्या सक्तीवरून माघार घेतली. आम्ही आधी विराट मोर्चा काढण्याचं ठरवलं होतं. मात्र, आता त्या मोर्चाचं मेळाव्यात रूपांतर होत आहे. पाऊस नसता तर आम्ही शिवतीर्थावर (शिवाजी पार्क, दादर) हा मेळावा घेतला असता. मात्र, आता वरळी येथील डोमवर हा कार्यक्रम घेत आहोत. राज्यभरातून लोक या मेळाव्याला येत आहेत.

कसा असेल कार्यक्रम?

या कार्यक्रमाची माहिती देताना खासदार राऊत म्हणाले, “राज्यातील मराठी जनतेला उद्धव व राज ठाकरे यांनी एकाच मंचावर एकत्र येऊन दिशादर्शन करावं ही मराठी बांधवांची भूमिका आहे. त्या दृष्टीने पहिलं पाऊल पडलं आहे. सकाळी ११.३० वाजता या विजयी मेळाव्याला सुरुवात होईल. इथे कुठलाही गाण्याचा कार्यक्रम होणार नाही. या कार्यक्रमासाठी भव्य मंच आणि हजारो लोकांची बसण्याची व्यवस्था करण्यात आली आहे. सुरुवातीला महाराष्ट्राचं राज्यगीत वाजवलं जाईल. त्यानंतर वरळी येथील कोळी बांधवांचं बँड पथक महाराष्ट्राच्या संस्कृतीचे दर्शन घडवेल.

This quiz is AI-generated and for edutainment purposes only.
हेही वाचा

संजय राऊत म्हणाले, “आम्ही राज्यातील अनेक नेत्यांना या कार्यक्रमाचं निमंत्रण दिलं आहे. मोठे नेते आले तर ते देखील या मंचावरून मराठी जनतेला संबोधित करतील. अजित भुरे हे या कार्यक्रमाचं सूत्रसंचालन करणार आहेत. अत्यंत आटोपशीर व सुटसुटीत असा कार्यक्रम होत आहे. सभागृहाच्या बाहेरही मोठ्या स्क्रीन लावल्या आहेत, जेणेकरून बाहेर जमलेले लोकही हा कार्यक्रम पाहू व ऐकू शकतील.”