सातारा : सातारा येथे स्पर्धेचे उद्घाटन जिल्हाधिकारी संतोष पाटील यांच्या हस्ते व उपजिल्हाधिकारी विक्रांत चव्हाण , जिल्हा पुरवठा अधिकारी वैशाली राजमाने, तसेच अ.भा.ना.प. शाखा सातारचे अध्यक्ष शिरीष चिटणीस, ज्येष्ठ रंगकर्मी शेखर कुलकर्णी, स्पर्धेचे परीक्षक श्याम अधटकर, मंजूषा जोशी, डॉ. शशिकांत चौधरी यांच्या उपस्थितीत नटराजपूजन व दीपप्रज्वलन करून पार पडले.
स्पर्धेमध्ये एकूण २० संघांचा सहभाग असून, सातारा जिल्हा मुख्य केंद्र झाल्यापासून एवढ्या मोठ्या प्रमाणात संघ सहभागी होण्याची ही पहिलीच वेळ आहे. सातारा जिल्हा मुख्य केंद्र झाल्यामुळे येथील स्थानिक नाट्यकर्मीना हक्काचे व्यासपीठ उपलब्ध झाल्याचे यावरून दिसून येते आहे.
दि. २७ नोव्हेंबरपर्यंत रोज संध्याकाळी ७ वाजता नाटकाचे प्रयोग सादर होणार आहेत, राज्य नाट्य स्पर्धेतील सर्व नाटकांना जास्तीत जास्त प्रेक्षकांनी उपस्थित राहावे आणि हौशी रंगकर्मींचा उत्साह वाढवावा, असे आवाहन सांस्कृतिक कार्य संचालक बिभीषण चवरे यांनी केलेले आहे.
जिल्हाधिकारी संतोष पाटील यांनी सर्व स्पर्धकांना शुभेच्छा दिल्या व उपस्थित प्रेक्षकांचे शासनाच्या वतीने आभार मानले. सांस्कृतिक कार्यमंत्री ॲड. आशिष शेलार व सांस्कृतिक कार्य विभागाचे सचिव डॉ. किरण कुलकर्णी यांच्या मार्गदर्शनाखाली राज्य नाट्य स्पर्धा पार पडणार असल्याचे चवरे यांनी नमूद केलेले आहे.
कार्यक्रमाचे सूत्रसंचालन नितीन देशमाने यांनी केले. कार्यक्रमाची सुरुवात महाराष्ट्र राज्य गीताने करण्यात आली. प्रास्ताविक, स्वागत व आभार स्पर्धेचे स्थानिक संयोजक कल्याण राक्षे यांनी केले.
