पंढरीत आजपासून श्री ज्ञानेश्वरी चिंतन संमेलन; संत ज्ञानेश्वर महाराजांच्या ७५० व्या जयंती वर्षानिमित्त आयोजन

येथील श्री विठ्ठल रुक्मिणी मंदिर समितीने श्री ज्ञानेश्वर चिंतन संमेलनाचे आयोजन केले आहे. या बाबत मंदिर समितीच्या बैठकीत याला मंजुरी देण्यात आली. दोन दिवसीय संमेलनाचे ४ ऑक्टोबर रोजी दुपारी पालकमंत्री जयकुमार गोरे यांच्या हस्ते उद्घाटन होणार आहे. यावेळी मंदिर समितीचे सहअध्यक्ष ह.भ.प. गहिनीनाथ महारज औसेकर हे प्रास्ताविक व स्वागत करणार आहेत. आचार्य डॉ. अनिल सहस्त्रबुद्धे संमेलनाची भूमिका सादर करतील. तर ह.भ.प. चंद्रशेखर महाराज देगलूरकर यांचे बीज भाषण, त्या नंतर ह.भ.प. भागवत महाराज साळुंके यांच्याकडून श्री निवृत्ती – ज्ञानदेव संवाद होईल.

तर संमेलनाच्या दुसऱ्या दिवशी म्हणजे ५ ऑक्टोबर रोजी “श्री ज्ञानेश्वर महाराज अद्वितीय तत्वज्ञ” या विषयावर उल्हास घोडके, इंदुताई खेडकर, प्रा. सुदाम देवखिळे, सुचित्रा भालेराव, संजय खेले यांचा सहभाग असून, या परिसंवादाचे अध्यक्ष दिलीप धनेश्वर असणार आहेत. या नंतर श्रीमद् भगवद्गीता व ज्ञानेश्वरीतील पात्रांचा तौलनिक विचार या विषयांवर ह.भ.प. चैतन्य महाराज देगलूरकर यांचे व्याख्यान तर ह.भ.प. जयवंत महाराज बोधले श्री ज्ञानेश्वर महाराज विरचित अमृतानुभव, अभय टिळक “श्री ज्ञानदेव, ज्ञानदेवी आणि भाषा व्यवहार यावर व्याख्याने देणार आहेत, अशी माहिती औसेकर महाराज यांनी दिली.

या संमेलनाचा समारोप जिल्हाधिकारी कुमार आशीर्वाद यांच्या उपस्थितीत पार पडणार आहे. ह.भ.प. उमेश बागडे हे कार्यक्रमाचे समन्वयक असणार आहेत. डॉ. अनिल सहस्त्रबुद्धे संमेलनाचा संपूर्ण आढावा सादर करतील. त्यानंतर संत पूजन, आभार प्रदर्शन व सामूहिक पसायदानाने संमेलनाची सांगता होईल, असे कार्यकारी अधिकारी राजेंद्र शेळके यांनी सांगीतले.