राजापूर : राजापूर तालुक्यातील नाटे येथील नाटेनगर विद्यामंदीर व कला वाणिज्य (संयुक्त) कनिष्ठ महाविद्यालय, नाटे येथे शाळेतील विद्यार्थ्यांसाठी आलेला पोषण आहाराचा तांदूळ चोरीचा धक्कादायक प्रकार उघडकीस आला आहे.मिळालेल्या माहितीनुसार, बुधवारी मध्यरात्री अशाप्रकारे शाळेच्या गोदामातून पोषण आहाराच्या धान्याची पोती चोरून नेताना स्थानिक ग्रामस्थांनी एक गाडी पकडून हा प्रकार उघड केला आहे. या धक्कादायक प्रकाराने तालुक्यामध्ये खळबळ उडाली आहे.मकरंद धाक्रस यांच्या लेखी तक्रारीवरून या प्रकरणाची तात्काळ दखल घेत नाटे पोलीसांनी संशयित शाळेचे मुख्याध्यापक, सहाय्यक शिक्षक आणि दोन ग्रामस्थ अशा चौघांविरोधात गुन्हा दाखल केल्याची माहिती पोलिसांनी दिली. यामध्ये तांदुळ व गाडीसह एकूण ३ लाख ७ हजार ५०० रुपयांचा माल ताब्यात घेण्यात आल्याचेही पोलिसांनी यावेळी स्पष्ट केले आहे.
याबाबत पोलिसांकडून बुधवारी रात्री नाटेश्वर मंदिरात त्रिपुरापौर्णिमेचा उत्सव सुरू असताना मकरंद मधुसुदन धाक्रस (वय ३७, रा. नाटे भराडीन) हे मंदिरात उपस्थित होते. त्याच दरम्यान मध्यरात्री रात्री १.२४ वाजता मनोज आडविलकर (रा. नाटे) यांनी त्यांना फोन करून नाटेनगर विद्यामंदीर येथे मुलांच्या पोषण आहाराकरिता आलेला तांदूळ चोरून नेताना गावकर्‍यांनी एक गाडी पकडल्याची माहती दिली. त्यानंतर श्री. धाक्रस यांनी शाळेचे शिपाई रविकांत भगवान धामापुरकर यांना फोन करून शाळेत पोहोचले. शाळेच्या पटांगणात अशोक लेलॅन्ड कंपनीची गाडी (गाडी क्रमांक एमएच- ०८- जे -६९२७) उभी होती. त्या गाडीत ५० किलो वजनाची एकूण १० पोती पोषण आहाराची भरलेली आढळली. ही गाडी कुणाल अनिल थळेश्री (रा. नाटे बांदचावाडी) याची असून त्याच्यासोबत सुनिल वसंत डुगीलकर (रा. नाटे बांदकरवाडी) हेही उपस्थित होते. याबाबत त्यांना विचारणा केली असता सुनिल डुगीलकर याने सहाय्यक शिक्षक नाना बीरा करे यांनी मला पोषण आहाराच्या खोलीची चावी देऊन दहा पोती तांदूळ काढून गाडीत भरा, पुढे कुठे पोहोचवायचे ते मी सांगतो असे सांगितले होते.
शाळेच्या पटांगणातून गाडी बाहेर पडत असताना महमद इसा आयाज म्हसकर आणि महमद तलहा हनीफ हातोडकर (दोघे रा. साखरी-नाटे) यांना याबाबत संशय आल्याने त्यांनी ही गाडी थांबवली. यावेळी ग्रामस्थ मोठ्या संख्येने शाळेच्या आवारात जमा झाले. यावेळी नाटे ग्रामपंचायतीचे सरपंच संदीप रामचंद्र बांदकर हे देखील शाळेच्या मैदानावर उपस्थित होते. त्यांनी गाडी अडवलेल्या ग्रामस्थांना प्रकरण तडजोडीत मिटवा असे सांगून विनंती केल्याचे यावेळी उपस्थित काहींनी लोकांनी सांगितले. त्यानंतर ते स्वतःची दुचाकी शाईन मोटरसायकल तेथेच ठेवून निघून गेले, अशी माहिती पोलीसांच्या जबाबात नमूद करण्यात आली आहे. या प्रकाराबाबत शाळेचे शिपाई रविकांत धामापुरकर यांनी सांगितले की, गाडीत भरलेले तांदूळ हे विद्यार्थ्यांच्या पोषण आहाराकरिता आलेले आहेत. या शाळेचे सहाय्यक शिक्षक नाना बीरा करे आणि मुख्याध्यापक रविंद्र तानु जाधव यांच्या सांगण्यावरूनच हा प्रकार घडल्याचे पोलीस तपासात पुढे आले असल्याचे पोलीसांनी सांगितले. याप्रकरणी मकरंद धाक्रस यांच्या लेखी तक्रारीवरून सागरी पोलीस ठाणे, नाटे यांनी संशयितांच्या विरोधात गुन्हा दाखल केला असून अधिक तपास सहाय्यक पोलीस फौजदार श्री. पिलनकर करीत आहेत.
तालुक्यातील नाटे येथील नाटेनगर विद्यामंदीर व कला वाणिज्य (संयुक्त) कनिष्ठ महाविद्यालय, नाटे येथे शाळेतील पोषण आहार तांदुळ चोरी प्रकरणाची जिल्हा परिषदेच्या शिक्षण विभागाने तात्काळ दखल घेतली आहे. या घटनेची माहिती मिळताच माध्यमिक शिक्षणाधिकारी किरण लोहार आणि राजापूरचे गटशिक्षणाधिकारी उत्तम भोसले आणि सहकार्‍यांनी शाळेला तातडीने भेट देऊन या प्रकाराची सविस्तर माहिती घेतली. नाटे सागरी पोलीस स्थानक येथे जाऊन सहाय्यक पोलीस निरीक्षक श्री. वाघ यांची भेट घेत तपासाच्या घडामोडींची सविस्तर माहिती घेतली.
हा प्रकार अत्यंत गंभीर असून आपण याची सखोल चौकशी सुरू केल्याची माहिती दिली. या प्रकरणातील दोषींवर कठोरातील कठोर कारवाई केली जाईल.श्री. कीरण लोहार, माध्यमिक शिक्षणाधिकारी जिल्हा परिषद,रत्नागिरी
