झी मराठी वाहिनीवरील 'अग्गंबाई सासूबाई' या मालिकेतील कथानकात दररोज नवनवीन वळणं पाहायला मिळत आहेत. अभिजीत (गिरीश ओक) आणि शुभ्रा (तेजश्री प्रधान) मिळून आसावरीसाठी नवीन प्लॅन आखत आहेत. आसावरीने (निवेदिता सराफ) बबड्या अर्थात सोहमचे (आशुतोष पत्की) किती लाड केले आहेत आणि त्याच्यासाठी ते किती वाईट आहे हे सांगण्याचा प्रयत्न अभिजीत करत आहेत. मात्र आता मालिकेच्या पुढील भागांत अभिजीत यांच्याबद्दलचा मोठा खुलासा होणार आहे. 'टाइम्स ऑफ इंडिया'ने दिलेल्या माहितीनुसार, 'अभीज किचन'मध्ये काम करणारी मॅडी आसावरीकडे अभिजीतच्या विवाहबाह्य संबंधाबद्दल खुलासा करणार आहे. आता हा खुलासा नेमका काय असेल आणि त्यावर आसावरीची काय प्रतिक्रिया असेल हे पाहणं औत्सुक्याचं ठरणार आहे. अभिजीत यांच्या बदललेल्या स्वभावामुळे आसावरी चिंतेत आहे. तर दुसरीकडे सोहमला त्यांच्या वागण्याबद्दल प्रश्न पडला आहे. अभिजीत आणि शुभ्राचा प्लॅन हळूहळू यशस्वी होत असतानाच मालिकेत नवीन ट्विस्ट येणार आहे. 'अग्गंबाई सासूबाई' या मालिकेत निवेदिता सराफ, गिरीश ओक, तेजश्री प्रधान आणि आशुतोष पत्की यांच्या मुख्य भूमिका आहेत.
