फक्त एक काॅल करा; सोनू सूदचं स्थलांतरितांना मदतीचं आश्वासन

लॉकडाउनचा काळ सुरु झाल्यापासून सोनू विविध मार्गाने गरजुंना मदत करत आहे. आतापर्यंत त्याने परराज्यातून आलेल्या अनेकांना त्यांच्या गावी सुखरुपरित्या पोहोचविलं आहे. त्यामुळे शहरांतील कानाकोपऱ्यांमध्ये अडकलेले मजूर सोनूकडून मदतीची अपेक्षा करत आहेत. त्यामुळेच प्रत्येक गरजूंपर्यंत पोहोचण्यासाठी सोनूने ट्विटरवर एक क्रमांक शेअर केला असून या क्रमांकावर फोन करुन ‘अडचण सांगा’, असं आवाहन केलं आहे.

सोनूने हा फोन क्रमांक शेअर करत ज्यांना घरी जायचं आहे, अशांनी कृपया मला कळवा असं म्हटलं आहे. “जर तुम्ही मुंबईमध्ये आहात आणि तुम्हाला परत तुमच्या गावी जायचं असेल तर कृपया १८००१२१३७११  या क्रमांकावर संपर्क साधा. तसंच तुम्ही किती जण आहात, नेमक्या कोणत्या ठिकाणी आहात आणि तुम्हाला कोणत्या गावी पोहोचायचं आहे हे सांगा. मी आणि माझी टीम शक्य होईल तितकी सगळी मदत करण्यासाठी तयार आहोत”, असं ट्विट सोनूने केलं आहे.

मेरे प्यारे श्रमिक भाइयों और बहनों. अगर आप मुंबई में है और अपने घर जाना चाहते हैं तो कृपया इस नंबर पर कॉल करें
18001213711
और बताएं आप कितने लोग हैं, अभी कहाँ पर हैं और कहां जाना चाहते हैं. मैं और मेरी टीम जो भी मदद कर पाएंगे हम जरूर करेंगे.
— sonu sood (@SonuSood) May 25, 2020

दरम्यान, सोनूचं हे ट्विट पाहिल्यानंतर अनेकांनी त्याच्यावर कौतुकाचा वर्षाव केला आहे. लॉकडाउन घोषित झाल्यापासून सोनू सातत्याने गरजुंना मदत करत आहे. आतापर्यंत त्याने जवळपास ४५ हजार जणांच्या जेवणाची सोय केली आहे. तसंच त्याचे हॉटेलदेखील डॉक्टर आणि अन्य कर्मचाऱ्यांना विश्रांतीसाठी दिले आहेत. इतकंच नाही तर त्याने आतापर्यंत हजारांपेक्षा जास्त मजुरांना त्यांच्या गावी पाठविण्यास मदत केली आहे.