बॉलिवूड अभिनेता सुशांत सिंह राजपूत याने गळफास घेऊन आत्महत्या केली. तो केवळ ३४ वर्षांचा होता. सुशांतने नैराश्यामुळे आत्महत्या केली असं म्हटलं जात आहे. दरम्यान त्याच्या आयुष्यावर अभिनेता कमाल आर. खान एक चित्रपट तयार करणार आहे. सुशांतला आत्महत्या करण्यासाठी प्रवृत्त करणाऱ्या लोकांना या चित्रपटाद्वारे तो एक्सपोज करणार आहे.

“सुशांत सिंह राजपुतवर मी लवकरच एक बायोपिक तयार करणार आहे. सुशांतला आत्महत्येसाठी प्रवृत्त करणाऱ्या लोकांना मी या चित्रपटाद्वारे जगासमोर आणणार आहे. मी बॉलिवूडचा द्वेष करतो. सुशांतला न्याय मिळायलाच पाहिजे.” अशा आशयाचं ट्विट कमाल खानने केलं आहे.

कमाल खान उर्फ केआरके आपल्या वादग्रस्त वक्तव्यांमुळे नेहमीच चर्चेत असतो. यावेळी त्याने बॉलिवूडवर निशाणा साधला आहे. बॉलिवूडमधील घराणेशाहीवर वारंवार टीका केली जात आहे. या पार्श्वभूमीवर कमालचे हे ट्विट सध्या सर्वांचेच लक्ष वेधून घेत आहे. काही तासांत शेकडो नेटकऱ्यांनी यावर आपल्या प्रतिक्रिया दिल्या आहेत.