सैफ अली खानची मुलगी अभिनेत्री सारा अली खानचं स्टारडम आज एखाद्या यशस्वी कलाकाराइतकंच आहे. साराने बॉलिवूडमध्ये फक्त दोनच चित्रपट केले आहेत. पण पदार्पणापासून नेहमीच ती चर्चेत राहिली आहे. ‘केदारनाथ’ आणि ‘सिम्बा’ चित्रपटांतील तिच्या अभिनयाने प्रेक्षक प्रभावित झाले. तर सोशल मीडियावरही तिच्या चाहत्यांची संख्या वाढू लागली. तिच्या प्रसिद्धीची दखल नावाजलेल्या ‘वोग’ या मासिकानेही घेतली. या मासिकासाठी साराने नुकतंच फोटोशूट केलं असून तिचे फोटो सोशल मीडियावर व्हायरल होत आहेत. या फोटोशूटमधील साराचा हॉट अंदाज तरुणांना घायाळ करत आहे.
‘बीच’ अर्थात समुद्रकिनारा या थीमवर आधारित साराचं फोटोशूट होतं. साराने तिच्या इन्स्टाग्राम अकाऊंटवर हे फोटो शेअर केले असून अल्पावधीतच त्यावर लाईक्स आणि कमेंट्सचा पाऊस पडत आहे. सार्वजनिक ठिकाणी तिचा बिनधास्त वावर, मुलाखतींमध्ये मोकळेपणाने बोलणं चाहत्यांना फार आवडत आहे. तरुणाईच्या आवडत्या अभिनेत्रींमध्ये साराने तिचं स्थान पक्क केलं आहे असं म्हणायला हरकत नाही.
सध्या सारा तिच्या आगामी चित्रपटाच्या शूटिंगमध्ये व्यग्र आहे. इम्तियाज अली दिग्दर्शित चित्रपटात ती कार्तिक आर्यनसोबत झळकणार आहे. हा चित्रपट ‘लव्ह आज कल’चा सीक्वल असल्याचं म्हटलं जात आहे. सारा-कार्तिकची ऑनस्क्रिन केमिस्ट्री पाहण्यासाठी चाहतेसुद्धा उत्सुक आहेत.
