Sitaare Zameen Par on Youtube : आमिर खानचा बहुचर्चित चित्रपट ‘सितारे जमीन पर’ पाहण्यासाठी थिएटरमध्ये जाऊ न शकलेल्यांसाठी एक आनंदाची बातमी आहे.
आमिर खान हा चित्रपट यूट्यूबवर प्रदर्शित करत आहे. तुम्ही तो यूट्यूब मूव्हीज-ऑन-डिमांडवर घरी बसून पाहू शकता. याबरोबरच हा चित्रपट इतर कोणत्याही डिजिटल प्लॅटफॉर्मवर प्रदर्शित होणार नाही. त्याचा चित्रपट बॉक्स ऑफिसवर सुपरहिट ठरला. ओटीटीच्या वाढत्या क्रेझमध्ये, आमिरने यापूर्वी तो ऑनलाइन प्रदर्शित न करण्याची घोषणा केली होती.
ओटीटीवर प्रदर्शित होणार नाही
आमिर खानने चित्रपट थिएटरमध्ये प्रदर्शित झाल्यानंतर ओटीटीऐवजी यूट्यूब मूव्हीज ऑन डिमांडवर ‘सितारे जमीन पर’ प्रदर्शित करण्याचा निर्णय घेतला आहे. जगभरातील लोकांपर्यंत हा चित्रपट कमी किमतीत पोहोचावा अशी त्याची इच्छा आहे. हा चित्रपट फक्त यूट्यूबवर उपलब्ध असेल आणि इतर कोणत्याही डिजिटल प्लॅटफॉर्मवर प्रदर्शित होणार नाही. १ ऑगस्टपासून १०० रुपयांना तो यूट्यूबवर पाहता येईल. आमिर खान, जिनिलीया देशमुख यांच्याबरोबर, बौद्धिक अपंग असलेले १० कलाकारदेखील या चित्रपटाचा एक महत्त्वाचा भाग आहेत.
भारतात हा चित्रपट १०० रुपयांना उपलब्ध असेल; तर अमेरिका, कॅनडा, यूके, ऑस्ट्रेलिया, जर्मनी, इंडोनेशिया, फिलीपिन्स, सिंगापूर आणि स्पेनसह ३८ देशांमध्ये तो स्थानिक किंमतीसह उपलब्ध असेल.
‘सितारे जमीन पर’ हा चित्रपट यूट्यूबवर प्रदर्शित झाल्यानंतर येत्या काळात आमिर खान प्रॉडक्शनचे इतर आवडते चित्रपटदेखील या प्लॅटफॉर्मवर दाखवले जातील असे म्हटले जात आहे.
‘सितारे जमीन पर’ या चित्रपटाने जगभरात २५० कोटींहून अधिक कमाई केली आहे. जगभरातील नवीन प्रेक्षकांपर्यंत पोहोचण्यासाठी ‘सितारे जमीन पर’ला प्रमुख भाषांमध्ये सबटायटल्स आणि डबिंगदेखील दिले जाईल.
या चित्रपटाबद्दल आमिर खान म्हणाला, “गेल्या १५ वर्षांपासून मी अशा लोकांपर्यंत पोहोचण्याचा प्रयत्न करत होतो, जे थिएटरमध्ये जाऊ शकत नाहीत किंवा काही कारणास्तव थिएटरमध्ये जाऊ शकत नाहीत. आपल्या सरकारने UPI सुरू केले आणि आता भारत इलेक्ट्रॉनिक पेमेंटमध्ये जगात पहिल्या क्रमांकावर आहे. भारतात इंटरनेटची सुविधादेखील खूप वेगाने वाढली आहे आणि दररोज वाढत आहे. तसेच YouTube जवळजवळ प्रत्येक उपकरणात आहे. आता आम्ही भारताच्या मोठ्या भागात आणि जगातील अनेक लोकांपर्यंत चित्रपट पोहोचवू शकतो. माझे स्वप्न आहे की सिनेमा प्रत्येकापर्यंत पोहोचावा, तेही परवडणाऱ्या किमतीत. मला वाटते की लोकांना केव्हाही, कुठेही चित्रपट पाहता यावा. नवीन कलाकारांसाठी आणि चित्रपट उद्योगात येणाऱ्या लोकांसाठीदेखील ही एक उत्तम संधी असेल. जर ही कल्पना यशस्वी झाली तर ती प्रत्येकासाठी फायदेशीर ठरेल.”
