Ahmedabad Plane Crash : अहमदाबाद विमानतळाजवळ झालेल्या भीषण विमान अपघाताच्या बातमीने सर्वांनाच धक्का बसला आहे. चित्रपटसृष्टीतील कलाकारही या अपघातावर शोक व्यक्त करत आहेत.
विमान अपघाताच्या बातमीनंतर बॉलीवूड अभिनेता सलमान खानने मुंबईतील आपला कार्यक्रम रद्द केला. आज, गुरुवारी (१२ जून) सलमान खान मुंबईतील एका हॉटेलमध्ये एका मीडिया कार्यक्रमाला उपस्थित राहणार होता.
“अशा वेळी आनंद साजरा करणे योग्य नाही” : सलमान खान
सूत्रांवर विश्वास ठेवला तर सलमान म्हणाला की, ‘अशा वेळी आनंद साजरा करणे योग्य नाही, कारण ही दुर्घटना खूप गंभीर आहे आणि देशभरातील लोक त्याबद्दल दुःखी आहेत.’ आज गुरुवारी दुपारी सलमान खान मुंबईतील एका हॉटेलमध्ये ISRL (इंडियन सुपरक्रॉस रेसिंग लीग) च्या मीडिया कार्यक्रमात सहभागी होणार होता. परंतु, अहमदाबादमधील विमानतळाजवळ झालेल्या भीषण विमान अपघाताची बातमी येताच, सलमान खानच्या टीमने हा कार्यक्रम रद्द करण्याचा निर्णय घेतला आहे.
सलमान खान हा ISRL चा ब्रँड अ‍ॅम्बेसेडर आहे. आज मुंबईतील ताज लँड्स एंड येथे एक पत्रकार परिषद होणार होती, ज्यामध्ये लीगच्या सीझन २ बद्दल माहिती दिली जाणार होती आणि सलमानच्या उपस्थितीत मीडियाशी संवाद साधला जाणार होता. परंतु, विमान अपघाताच्या घटनेनंतर सलमानने हा कार्यक्रम रद्द केला. जवळच्या सूत्रांनी दिलेल्या माहितीनुसार, अपघाताची माहिती मिळताच त्याने ‘आज कोणत्याही गोष्टीचा प्रचार करणे किंवा हसणे योग्य नाही’ असे म्हटले.
अहमदाबादमध्ये काय घडले?
आज, गुरुवारी एअर इंडियाचे विमान (AI171) अहमदाबादहून उड्डाण करताच कोसळले. हे विमान लंडनला जात होते. मेघाणी नगर भागात हा अपघात झाला, जिथे विमान ६०० फूट उंचीवर होते. विमानात २४० हून अधिक प्रवासी होते. विमान कोसळताच परिसरात मोठी आग लागली आणि आकाशात काळा धूर पसरला. मदत आणि बचाव कार्य सुरू आहे. अपघाताची भीषणता पाहून देशभरात शोककळा पसरली आहे. सर्वांना धक्का बसला आहे आणि पीडितांसाठी प्रार्थना केली जात आहे.
