बॉलीवूडच्या आघाडीच्या अभिनेत्यांमध्ये सोनू सूदचे नाव घेतले जाते. लॉकडाऊन दरम्यान देशातील गरजू लोकांना मदत केल्यामुळे सोनू सूदला प्रचंड लोकप्रियता मिळाली होती. सध्या सोनू सूद हा ‘फतेह’ या चित्रपटामुळे चर्चेत आहे. अलीकडेच अभिनेत्याने ट्विटरवर ‘आस्क सोनू’ हे सेशन घेतले होते. यावेळी सोनूने चाहत्यांनी विचारलेल्या प्रत्येक प्रश्नाला समर्पक उत्तरे दिली.
ट्विटरवर ‘आस्क सोनू’ सेशनमध्ये अभिनेत्याच्या एका चाहत्याने त्याला प्रश्न विचारला की, “सर देव करो असे होऊ नये पण, भविष्यात तुमचे चित्रपट फ्लॉप झाले, तर तुम्ही कॅनडाचे नागरिकत्व स्वीकाराल का?” या प्रश्नाला उत्तर देत सोनू सूद म्हणाला, माझे आयुष्य चित्रपटांपेक्षा खूप वेगळे आहे आणि मित्रा, माझ्यासाठी हिंदुस्थानपेक्षा श्रेष्ठ काहीच नाही.’ सोनू सूदचे हे उत्तर पाहून त्याच्या चाहत्यांनी त्याचे कौतुक करीत “तू आमचे मन जिंकलेस” अशा प्रतिक्रिया दिल्या आहेत.
सोनू सूदच्या आणखी एका चाहत्याने “तुला काही लोक देव समजतात यावर तुझे म्हणणे काय?” यावर अभिनेता म्हणाला, “मी एक साधा माणूस आहे आणि या देशातील प्रत्येक माणसाशी जोडण्याचा मी प्रयत्न करीत आहे.” ट्विटरवर अनेकदा शाहरुख खान, सोनू सूद यांसारखे कलाकार ‘आस्क मी सेशन’ घेऊन चाहत्यांच्या प्रश्नांना समर्पक उत्तरे देतात.
हेही वाचा : बॉलीवूडच्या ‘या’ प्रसिद्ध अभिनेत्रीला ओळखलंत का? बालपणी व्हायचं होतं वैमानिक, पण…
दरम्यान, अभिनेता सोनू सूद लवकरच ‘फतेह’ चित्रपटात झळकणार आहे. या चित्रपटासाठी सोनू प्रचंड मेहनत घेत असून त्याने त्याच्या वर्कआउटचे अनेक व्हिडीओ सोशल मीडिया अकाऊंटवर शेअर केले आहेत. ‘फतेह’ मध्ये सोनूबरोबर अभिनेत्री जॅकलिन फर्नांडिस प्रमुख भूमिका साकारणार आहे. चित्रपटाची रिलीज डेट अद्याप जाहीर करण्यात आलेली नाही.
