‘कौन बनेगा करोडपती’ या कार्यक्रमादरम्यान अनेक चाहत्यांना बिग बी अमिताभ बच्चन यांना भेटण्याची संधी मिळते. अमिताभ यांना प्रत्यक्षात पाहून त्यांचं तोंडभरुन कौतुक करतात. आताही या शोच्या सेटवर एका महिलेने अमिताभ यांच्या ओठांचं कौतुक केलं. दरम्यान त्यांनी ‘आनंद’ या चित्रपटाचा ब्लॉगद्वारे एक किस्सा सांगितला.
१९७१मध्ये ‘आनंद’ चित्रपट प्रदर्शित झाला. ऋषिकेश मुखर्जी यांनी या चित्रपटाचे दिग्दर्शन केलं होतं. तर राजेश खन्ना चित्रपटात मुख्य भूमिकेत होते. अमिताभ यांनी त्यांच्या ब्लॉगमध्ये म्हटलं की, “एका महिलेने ‘केबीसी’मध्ये माझ्या ओठांवर कमेंट केली. हा ‘आनंद’ चित्रपटामधील एक फोटो आहे. या फोटोमागेही एक किस्सा आहे. माझ्या ओठांचा रंगच लालसर आहे.”
“‘आनंद’च्या चित्रीकरणादरम्यान जेव्हा मी कॅमेऱ्यासमोर आलो तेव्हा दिग्दर्शक व डिओपी मला ओरडू लागले. म्हणाले की, “तू ओठांवर लिपस्टिक का लावलीस? तुला काय वाटतं तू कोण आहेस? ती लिपस्टिक आधी पुसून ये.”
यावर लिपस्टिक लावली नसल्याचं अमिताभ यांनी दिग्दर्शक व डिओपीला सांगितलं. मात्र त्यांनी या गोष्टीवर विश्वास ठेवला नाही. पुन्हा अमिताभ यांना दोघंही ओरडले. मेकअपमनला त्यांचे ओठ पुसण्यास सांगितले. त्यानेही प्रयत्न केले. पण अमिताभ यांच्या ओठांचा रंगच नैसर्गिक असल्याचं मेकअपमनने दिग्दर्शकाला सांगितलं. आजही अमिताभ यांच्या हा किस्सा आठवणीत आहे.
