अभिनेत्री कंगना रणौत नेहमीच तिच्या वादग्रस्त विधानांमुळे चर्चेत असते. काही दिवसांपूर्वीच तिने ट्विटरवर पुनरागमन केलं. त्यानंतर तिने केलेले ट्वीट सोशल मीडियावर व्हायरल होत आहेत. शाहरुख खान व दीपिका पदुकोणच्या ‘पठाण’ चित्रपटाला मिळत असलेल्या यशाबाबतही तिने भाष्य केलं. आताही ती ‘पठाण’बाबत वेगवेगळे ट्वीट करत आहे. यावरुनच एक युजरने कंगनाला तिच्या ‘धाकड’ चित्रपटाची आठवण करुन दिली.
आणखी वाचा – शाहरुख खानच्या ‘पठाण’ चित्रपटाबाबत सुप्रिया सुळे यांचं वक्तव्य, म्हणाल्या, “तो भारताचा…”
नेमकं प्रकरण काय?
“कंगना तुझ्या ‘धाकड’ चित्रपटाने प्रदर्शनाच्या पहिल्या दिवशी फक्त ५५ लाख रुपये कमाई केली होती. शिवाय या चित्रपटाचं संपूर्ण बॉक्स ऑफिस कलेक्शन फक्त २ कोटी ५८ लाख रुपये होतं. पण ‘पठाण’ चित्रपटाने प्रदर्शनाच्या पहिल्याच दिवशी १०० कोटी रुपयांपेक्षा अधिक कमाई केली आहे. कंगना नक्कीच निराश झाली असणार.” असं एका युजरने कंगनाच्या ट्विटवर कमेंट केली.
या युजरला कंगनाने अगदी स्पष्ट शब्दांमध्ये उत्तर दिलं. कंगना म्हणाली, “हो, ‘धाकड’ हा एक मोठा ऐतिहासिक फ्लॉप चित्रपट होता. ही गोष्ट मी कधीच टाळली नाही. शाहरुख खानचा गेल्या दहा वर्षांमध्ये हा पहिलाच चित्रपट चालला आहे. मीही त्याच्याकडून प्रेरणा घेते. भारताने जशी संधी त्याला दिली तशी आम्हालाही मिळेल अशी मी आशा करते. कारण भारत देश महान आहे. जय श्रीराम”.
आणखी वाचा – शाहरुख खानच्या ‘पठाण’ने तीन दिवसांमध्येच जगभरात कमावले इतके कोटी, खरी आकडेवारी समोर
काही दिवसांपूर्वीच कंगनाने तिच्या आगामी चित्रपटाच्या रॅपअप पार्टीदरम्यान ‘पठाण’बाबत भाष्य केलं होतं. तिने शाहरुखच्या या चित्रपटाचं कौतुकही केलं. शिवाय हिंदी चित्रपटांना पुढे आणण्यासाठी प्रत्येकजण प्रयत्न करत असल्याचंही कंगनाने म्हटलं होतं. आता शाहरुखच्या या चित्रपटाने जगभरात ३०० कोटी रुपयांचा टप्पा पार केला आहे.
