कतरिना कैफ व विजय सेतुपती देणार यंदा ख्रिसमस स्पेशल गिफ्ट; आगामी ‘मेरी ख्रिसमस’ चित्रपटाचं पोस्टर प्रदर्शित

आधी हा चित्रपट २०२२ मध्ये प्रदर्शित होणार होता. आता हा चित्रपट १५ डिसेंबर २०२३ रोजी प्रदर्शित होणार आहे. विजय सेतुपती आणि कतरिना कैफ यांनी दोन पोस्टर लाँच केले, एक हिंदीमध्ये आणि दुसरे तमिळमध्ये. दोन्ही पोस्टरमध्ये कतरिना आणि विजय दिसत आहेत आणि या पोस्टरने सर्वांचीच उत्सुकता वाढवली आहे.

आणखी वाचा : शाहरुख खानचा ‘जवान’ पहिल्याच दिवशी कमावणार ‘इतके’ कोटी; प्रसिद्ध अभिनेत्याची भविष्यवाणी

नवीन पोस्टर विंटेज वाइब्स प्रेक्षकांना मिळत आहेत. हिंदी पोस्टर पाहिलं तर त्यात आपल्याला जुन्या मुंबईची झलक पाहायला मिळत आहे. पोस्टरवर ‘रात जितनी संगीन होगी, सुबह उतनी रंगीन होगी’ अशी टॅगलाइन लिहिली आहे. हिंदी भाषेतील चित्रपटात संजय कपूर, विनय पाठक, प्रतिमा कन्नन आणि टिनू आनंद यांच्याही भूमिका आहेत, तर तमिळ भाषेतील चित्रपटात राधिका सरथकुमार, षणमुगराजा, केविन जय बाबू आणि राजेश विल्यम्स यांच्या भूमिका आहेत.

अश्विनी काळसेकर आणि राधिका आपटे या दोघी अभिनेत्रीही कॅमिओमध्ये दिसणार आहेत. मीडिया रीपोर्टनुसार हा चित्रपट एक क्राइम थ्रिलर असून याचं कथानक ख्रिसमसच्या पूर्वसंध्येभोवती फिरणार असल्याचं स्पष्ट होत आहे. ‘अंधाधून’, ‘बदलापूर’सारखे लाजवाब आणि हटके चित्रपट देणाऱ्या श्रीराम राघवन यांच्या या चित्रपटाची भारतीय प्रेक्षक आतुरतेने वाट बघत आहे.