Rishabh Shetty Kantara 2 Junior Artist Dies : २०२२ मध्ये आलेला ऋषभ शेट्टीचा ‘कांतारा’ चित्रपट बॉक्स ऑफिसवर चांगलाच गाजला होता. चित्रपटाला मिळालेले यश पाहुन ऋषभ शेट्टीने ‘कांतारा २’ ची घोषणा केली होती. तेव्हापासून चाहते या चित्रपटाची आतुरतेने वाट पाहत आहेत. काही दिवसांपुर्वी या चित्रपटाचा एक टीझरही समोर आला होता. या टीझर व्हिडीओला चाहत्यांकडून तूफान प्रतिसाद मिळाला होता. अशातच आता या चित्रपटाबद्दल एक महत्त्वाचं वृत्त समोर येत आहे, ते म्हणजे चित्रपटाच्या सेटवरील एका ज्युनिअर आर्टिस्टचा मृत्यू झाला आहे.
इंडिया टूडेच्या वृत्तानुसार, केरळमधील एमएफ कपिल नावाच्या ज्युनिअर आर्टिस्टची मंगळवारी (७ मे) दुपारी कोल्लूरमधील सौपर्णीका नदीत बुडून मृत्यू झाल्याची माहिती समोर येत आहे. जेवणाच्या सुट्टीनंतर तो नदीत पोहण्यासाठी गेला असता पाण्याच्या प्रवाहात वाहून गेल्याचे वृत्त आहे. यानंतर स्थानिक अग्निशमन विभागासह त्याचं तात्काळ शोध घेतला आणि बचाव कार्य सुरू केले. मग संध्याकाळी कपिलचा मृतदेह नदीत सापडला.
याप्रकरणी कोल्लूर पोलिस ठाण्यात गुन्हा दाखल करण्यात आला आहे आणि घटनेसंदर्भात पोलिसांचा पुढील तपास सुरू आहे. या ज्युनिअर आर्टिस्टच्या अपघाती निधनामुळे चित्रपटातील कलाकारांवर शोककळा पसरली आहे. या घटनेमुळे चित्रीकरणही थांबलं आहे. दरम्यान, गेल्या काही महिन्यांपासून अनेक आव्हानांना तोंड देत असलेल्या ‘कांतारा २’ चित्रपटाच्या टीमसाठी ही घटना म्हणजे आणखी एक धक्का आहे. यापूर्वी कोल्लूरमध्ये काही कलाकारांना घेऊन जाणारी बस उलटली होती.
याव्यतिरिक्त, वारा आणि पावसामुळे चित्रपटाचा भव्य सेटचंही नुकसान झालं होतं. त्यानंतर चित्रीकरणादरम्यान नैसर्गिक अधिवासाला त्रास दिल्याच्या आरोपाखाली वन विभागाकडूनही टीमची चौकशी करण्यात आली होती. शिवाय निर्मात्यांना येणाऱ्या अडचणींमुळे चित्रपटाचे प्रदर्शन लांबणीवर पडल्याच्या अफवाही पसरल्या होत्या. मात्र यावर मग निर्मात्यांनी २ ऑक्टोबर ही चित्रपटाच्या प्रदर्शनाची तारीख असल्याचे अधिकृतपणे जाहीर केलं. अशातच आता ही ज्युनिअर आर्टिस्टच्या मृत्यूची दु:खद घटना घडली आहे.
काही दिवसांपुर्वी रितेश देशमुखच्या आगामी ‘राजा शिवाजी’ चित्रपटाच्या सेटवरदेखील अशीच दु:खद घटना घडली होती. चित्रपटाच्या कोरिओग्राफी टीमचा भाग असलेल्या २६ वर्षीय डान्सरचा कृष्णा नदीत बुडून मृत्यू झाला. सौरभ शर्मा असे त्याचे नाव असून सातारा जिल्ह्यातील संगम माहुली गावात ‘राजा शिवाजी’ चित्रपटाचे शूटिंग सुरू असताना ही घटना घडली होती.
दरम्यान, ‘कांतारा २’बद्दल सांगायचे झाल्यास या चित्रपटाचे लिखाण आणि दिग्दर्शन ऋषभ शेट्टीनेच केले होते. २०२२ मध्ये आलेल्या या चित्रपटासाठी ऋषभला सर्वोत्कृष्ट अभिनेत्याचा राष्ट्रीय पुरस्कारही मिळाला होता. ‘कांतारा: चॅप्टर १ – ए लीजेंड’ हा चित्रपट येत्या २ ऑक्टोबर २०२५ रोजी गांधी जयंतीच्या मुहूर्तावर सर्वत्र प्रदर्शित होणार आहे.
