बहुभाषिक ओटीटीच्या मराठी विभागाची सुरुवात

८०-९० च्या दशकातील गाजलेले मराठी चित्रपट, तसेच ‘व्हिसिलग वूड्स इंटरनॅशनल’ या संस्थेच्या विद्यार्थ्यांनी बनवलेले लघुपटसुद्धा ‘१ ओटीटी’वर उपलब्ध होणार असून हे सर्व प्रेक्षकांसाठी विनामूल्य असणार आहे. अभिनेता स्वप्निल जोशी या ‘१ ओटीटी’चा सह-संस्थापक असून वेंकटेश श्रीनिवासन, राजीव जानी तसेच आघाडीचे बँकर सतीश उतेकर आणि करमणूक उद्योग क्षेत्रातील आघाडीचे उद्योजक चेतन मणियार यांचे सहकार्य या ओटीटीसाठी लाभले आहे. लवकरच या व्यासपीठावर गुजराती, बंगाली, भोजपुरी अशा इतर प्रादेशिक भाषांमधील मनोरंजनात्मक कार्यक्रम पाहायला मिळणार आहेत. त्या माध्यमातून हे व्यासपीठ ‘भारताचा ओटीटी’ ठरणार आहे.

‘१ ओटीटी’वर प्रदर्शित झालेल्या ‘ब्लाइंड डेट’चे लेखन प्रसिद्ध लेखिका मनस्विनी लता रवींद्र आणि अपूर्व साठे यांनी केले आहे. दहा भागांच्या या वेब मालिकेत विशाखा सुभेदार, सौरभ घाडगे, हेमांगी कवी, अभिजित खांडकेकर, रुपाली भोसले, स्पृहा जोशी, हेमंत ढोमे, सुव्रत जोशी, पूजा ठोंबरे, भाग्यश्री लिमये, सायली संजीव, गश्मीर महाजनी यांसारखे नामवंत आणि आघाडीचे कलाकार दिसणार आहेत. ‘आज ‘१ ओटीटी’ या मराठी व्यासपीठाचा शुभारंभ करताना आम्हाला अतिशय आनंद होतो आहे. आम्ही दाखल करत असलेली मालिका आणि कार्यक्रम रसिकांना नक्की आवडतील आणि त्यांनाही प्रेक्षकांचा उत्तम असा प्रतिसाद मिळेल याची मला पूर्ण खात्री आहे,’ अशी भावना अभिनेता स्वप्निल जोशी यांनी व्यक्त केली.