“ती कायमच माझ्यासाठी…” प्रार्थना बेहेरेबद्दलच्या ‘त्या’ प्रश्नावर वैभव तत्त्ववादी स्पष्टच बोलला

वैभव तत्त्ववादी हा सध्या त्याच्या ‘सर्किट’ या चित्रपटामुळे चर्चेत आहे. या चित्रपटाच्या निमित्ताने वैभव तत्त्ववादीने ‘लोकसत्ता डिजीटल अड्डा’ला मुलाखत दिली. या मुलाखतीत त्याने याबद्दल भाष्य केले.
आणखी वाचा : Video : “आमचं लग्न…” वैभव तत्ववादीचं नाव घेत प्रार्थना बेहेरेने दिलेले थेट उत्तर

यावेळी वैभवला “तुला आणि प्रार्थनला एकत्र काम करायला कधी पाहायला मिळेल”, असा प्रश्न विचारण्यात आला होता. त्यावर तो म्हणाला, “मला आणि प्रार्थनाला पुन्हा एकत्र काम करण्याची खूप इच्छा आहे. पण आम्ही एकत्र चित्रपट केल्यानंतर अनेकजण सांगतात की काय मग तु्म्हीच सारखे सारखे चित्रपट करणार का? त्यावर त्यांना सांगावं वाटतं की, “अरे शेवटचा चित्रपट प्रदर्शित होऊन पाच वर्षे झाले.”

यानंतर त्याला कॉफी आणि बरंच काही नंतर अनेकांनी तुमचं अफेअर आहे, तुम्ही रिलेशनमध्ये आहात, अशा चर्चा होत्या, असे विचारले असता त्यावर त्याने फारच मजेशीररित्या उत्तर दिले. त्यावर तो म्हणाला की, “चर्चा काय लग्न झालं अशा बातम्या देखील होत्या. माझ्या आजीने आईला प्रश्नही विचारला होता की, वैभवने लग्न केलं आपल्याला सांगितलंही नाही.”

“पण प्रार्थनाबरोबर काम करताना एक वेगळीच मज्जा येते. तिच्याबरोबरची केमिस्ट्री स्क्रीनवर पाहताना नक्कीच जाणवते. मला असं कायमच वाटतं की तुम्ही इतर सहकलाकारांबरोबर ज्या पद्धतीने काम करताना जी काही मज्जा करता त्यालाच केमिस्ट्री म्हणतात. प्रार्थनाबरोबर काम करताना आम्ही खूप धमाल करायचो. आम्ही इतके चांगले मित्र आहोत.

प्रार्थना मला कायमच सांगत असते की माझा नवरा जितका माझ्यावर रागवत नाही, तितका तू मला ओरडत असतो. पण ते ठीक आहे, त्यालाच मैत्री आणि मित्रत्व म्हणतात. आम्ही कॉफी आणि बरंच काही जेव्हा शूट करत होतो, त्यावेळी ती अजिबात फिटनेस फ्रीक वैगरे नव्हती. मी तिला कायमच त्यावरुन ओरडायचो. जरा तब्येतीकडे लक्ष दे, व्यायाम कर.

पण आज जेव्हा मी तिला पाहतो, तेव्हा मला तिचा नक्कीच अभिमान वाटतो. तिने स्वत:ला ज्या पद्धतीने फिटनेस फ्रीक बनवलं आहे, त्याबद्दल मला तिचे कौतुक आणि अभिमान दोन्हीही आहे. एक अभिनेत्री म्हणून ती फारच गोड आहे. माझ्याकडे तिच्या हसण्याचा एक व्हिडीओ आहे. मी आजही कधीही कंटाळलो, मला डिप्रेस झाल्यासारखं वाटलं की मी तिचा तो व्हिडीओ पाहतो. तिचा हसण्याचा तो व्हिडीओ मी पाहिला की सर्व थकवा निघून जातो. ती कायमच माझ्यासाठी स्ट्रेस बस्टर आहे”, असे वैभव तत्त्ववादीने म्हटले.

दरम्यान अभिनेत्री प्रार्थना बेहेरे आणि वैभव तत्ववादी यांनी आतापर्यंत अनेक चित्रपटात एकत्र काम केले आहे. त्याच्या ऑनस्क्रीन जोडीचे अनेकजण चाहते आहेत. प्रार्थना बेहेरे आणि वैभव तत्ववादी हे दोघेही रिलेशनशिपमध्ये असल्याच्या आणि एकमेकांना डेट करत असल्याचेही बोललं जातं होतं. मात्र या दोघांनीही यावर स्पष्ट नकार दिला होता.