Manache Shlok Movie New Name Announced : ‘मनाचे श्लोक’ या नावामुळे मृण्मयी देशपांडेचा चित्रपट वादात अडकला होता. पश्चिम महाराष्ट्रासह इतर काही ठिकाणी सिनेमाला विरोध झाला. प्रदर्शित झाल्यावर चित्रपटाचे शो बंद पाडण्यात आले होते. त्यानंतर मृण्मयीने चित्रपटाचं प्रदर्शन थांबवत असल्याची घोषणा केली होती. आता या चित्रपटाचं नवीन नाव जाहीर करण्यात आलं आहे. तसेच हा चित्रपट नव्या नावासह १६ ऑक्टोबरला रिलीज होणार आहे.
मृण्मयी देशपांडे लिखित आणि दिग्दर्शित ‘मनाचे श्लोक’ चित्रपट ‘तू बोल ना’ या नव्या नावासह पुन्हा एकदा प्रेक्षकांच्या भेटीला येणार आहे. ‘तू बोल ना’ हा चित्रपट संपूर्ण महाराष्ट्रभर येत्या गुरुवारी, १६ ऑक्टोबर रोजी प्रदर्शित होत आहे.
याआधी या चित्रपटाचे नाव ‘मनाचे श्लोक’ असं होतं. सेन्सॉर बोर्ड आणि न्यायालयाने चित्रपटाच्या प्रदर्शनाला परवानगी दिल्यानंतरही काही संघटनांच्या वतीने चित्रपटाचं प्रदर्शन थांबवण्याचा प्रयत्न केला गेला. या सगळ्या गोंधळानंतर निर्मात्यांनी प्रेक्षकांना चित्रपट पाहण्यासाठी कोणत्याही प्रकारचा त्रास होऊ नये, थिएटर्स आणि सार्वजनिक मालमत्तेचे नुकसान होऊ नये, यासाठी नव्या नावासह चित्रपट पुन्हा सादर करण्याचा निर्णय घेतला आहे.
पाहा व्हिडीओ-
बदललेल्या नावाबद्दल निर्माते म्हणाले, ”गेले काही दिवस आमच्यासाठी कठीण काळ होता, परंतु रसिक प्रेक्षक, समाजमाध्यमं आणि हिंदी – मराठी चित्रपटसृष्टीचा अभूतपूर्व पाठिंबा आम्हाला खूप बळ देऊन गेला. त्यामुळे आता आम्ही पुन्हा एकदा नव्या नावानं, नव्या ऊर्जेनं चित्रपट प्रदर्शित करत आहोत. रसिकांना आता हा चित्रपट कोणत्याही अडचणीशिवाय पाहता येईल.”
‘मनाचे श्लोक’ या चित्रपटात मृण्मयी देशपांडे, राहुल पेठे, पुष्कराज चिरपुटकर, सुव्रत जोशी, सिद्धार्थ मेनन, हरीश दुधाडे आणि करण परब अशी तरुणांची तगडी फळी झळकणार आहे. तसेच लीना भागवत, मंगेश कदम, शुभांगी गोखले आणि उदय टिकेकर हे ज्येष्ठ कलाकारही महत्त्वाच्या भूमिका साकारत आहेत.
