‘महाराष्ट्राची हास्यजत्रा’ फेम अभिनेत्री वनिता खरात २ फेब्रुवारीला लग्नबंधनात अडकली. वनिताने बॉयफ्रेंड सुमित लोंढेबरोबर सपत्पदी घेत तिच्या नव्या आयुष्याला सुरुवात केली आहे. नातेवाईक व मित्रपरिवाराच्या उपस्थितीत वनिता व सुमितचा लग्नसोहळा पार पडला. वनिताच्या लग्नाचे विविध फोटो आणि व्हिडीओ व्हायरल होताना दिसत आहे. आता सुमित लोंढेने वनितासाठी घेतलेल्या उखाण्याचा व्हिडीओ समोर आला आहे.
वनिता आणि सुमित लोंढे यांच्या लग्नाची गेल्या कित्येक दिवसांपासून चर्चा सुरु होती. त्यांच्या मेहंदी आणि हळदी सोहळ्यातील फोटोही व्हायरल झाले होते. तिने तिच्या लग्नासाठी पांढऱ्या रंगाची साडी नऊवारी साडी, डिझायनर ब्लाऊज आणि पैठणी शेला असा मराठमोळा लूक केला होता. त्याबरोबर तिने पारंपरिक दागिनेही परिधान केले होते.
आणखी वाचा : ‘महाराष्ट्राची हास्यजत्रा’ फेम वनिता खरातने बांधली लग्नगाठ, फोटो पाहिलेत का?
तर सुमितने शेरवानी आणि फेटा बांधत शाही लूक केला होता. त्यानंतर या दोघांनी रिसेप्शनला साडी आणि ब्लेझर असा वेस्टर्न लूक केला होता. यावेळी वनिताने जांभळ्या रंगाची साडी परिधान केली होती. तर सुमीत हा निळ्या रंगाच्या सूट-बुटात पाहायला मिळाला. आता सोशल मीडियावर वनिता व सुमितच्या लग्नाच्या काही खास क्षणांचे फोटो-व्हिडीओ व्हायरल होताना दिसत आहे.
यावेळी सुमित लोंढेने वनितासाठी खास उखाणा घेतला. “तू दिसतेस फार सुंदर साडीवर, इथून पुढे तुला फिरवणार आहे माझ्या गाडीवर”, असा उखाणा सुमितने वनितसााठी घेतला. त्याचा हा उखाणा ऐकून वनिताने अग्गबाई असं म्हटलं. त्याच्या या उखाण्याचा व्हिडीओ सध्या व्हायरल होत आहे.
दरम्यान वनिता व सुमितच्या लग्नात ‘महाराष्ट्राची हास्यजत्रा’ शोमधील अनेक कलाकारांनी हजेरी लावली होती. वनिताचा नवरा सुमित एक व्हिडीओ क्रिएटर आणि ब्लॉगर आहे. त्याला फिरण्याचीही प्रचंड आवड आहे. एका पिकनिकमध्ये वनिता व सुमित एकमेकांना भेटले. आधीपासूनच मित्र असलेल्या वनिता व सुमितची पिकनिकनंतर घट्ट मैत्री झाली. लॉकडाऊनमध्ये ते एकत्र लुडोही खेळायचे. मैत्रीचं रुपातंर प्रेमात झाल्यानंतर वनिता व सुमितने लग्न करण्याचा निर्णय घेतला.
