जुई गडकरीचं ठरलं! छोट्या पडद्यावर करणार दमदार पुनरागमन, प्रोमो व्हायरल

स्टार प्रवाहवरील पुढचं पाऊल या मालिकेतून जुई गडकरी ही घराघरात पोहोचली. या मालिकेत तिने कल्याणी हे पात्र साकारलं होतं. या रुपात ती घराघरात पोहोचली. त्यानंतर आता लवकरच जुई गडकरी छोट्या पडद्यावर पुनरागमन करणार आहे. ‘ठरलं तर मग’ या मालिकेतून ती लवकरच प्रेक्षकांच्या भेटीला येणार आहे. ठरलं तर मग या मालिकेतून प्रेक्षकांना आपलीशी वाटणारी नवी गोष्ट आणि नवी पात्र भेटीला येणार आहेत. खऱ्या प्रेमाची साक्ष देणारी ही मालिका असेल. या मालिकेचा एक प्रोमोही समोर आला आहे.
आणखी वाचा : “…अन् उरलं सुरलं अवसान गळून गेलं”, गंभीर आजाराने ग्रस्त असलेल्या अभिनेत्री जुई गडकरीची पोस्ट चर्चेत

ठरलं तर मग मालिकेतील भूमिकेविषयी सांगताना जुई म्हणाली, “ही मालिका करताना मला अतिशय आनंद होत आहे. माहेरी आल्याची भावना आहे. पुढचं पाऊल मालिकेतल्या कल्याणीवर प्रेक्षकांनी भरभरुन प्रेम केलं आहे. त्यामुळे या नव्या पात्रावरही प्रेक्षक भरभरुन प्रेम करतील याची खात्री आहे.”

“सायली ही अतिशय समजूतदार आणि स्वतंत्र विचारांची मुलगी आहे. अनाथ असली तरी नात्यांचं महत्व जाणणारी, अन्याय सहन न करणारी मात्र प्रचंड वेंधळी. सायलीच्या वेंधळेपणामुळेच मालिकेत मजेशीर प्रसंगही पाहायला मिळतील. सर्वात महत्त्वाचं म्हणजे मालिकेची कथा ही मालिकेचं बलस्थान आहे. त्यामुळे मी स्वत:ला भाग्यवान समजतेय की इतक्या छान प्रोजक्टचा मला भाग होता आलं”, असेही जुईने सांगितले आहे.

आणखी वाचा : “एक चांगलं रुग्णालय आणि २४ तास लाईट…”, अभिनेत्री जुई गडकरीने मांडल्या कर्जतकरांच्या व्यथा

आदेश आणि सुचित्रा बांदेकर यांच्या सोहम प्रोडक्शन्स या मालिकेची निर्मिती केली आहे. तर सचिन गोखले या मालिकेचं दिग्दर्शन करणार आहेत. ‘ठरलं तर मग’ ही मालिका ५ डिसेंबरपासून रात्री ८.३० वाजता प्रदर्शित होणार आहे.