‘बिग बॉस १६’चा ग्रँड फिनाले गेल्याच आठवड्यात संपन्न झाला. अखेरीस शिव ठाकरे आणि एमसी स्टॅन यांच्यात चुरशीची लढत होती. अखेर यात पुण्याचा रॅपर एमसी स्टॅनने बाजी मारत विजेतेपदावर स्वतःचं नाव कोरलं. विजेतेपद स्टॅनला मिळालं असलं तरीही सगळीकडे चर्चा शिव ठाकरेची होत आहे. या कार्यक्रमात जिंकण्यासाठी शिवला प्रचंड पाठिंबा मिळाला आहे. आता त्या सर्वांना शिवने एक खास वचन दिलं आहे.
‘बिग बॉस १६’ मुळे शिव ठाकरेचा चाहता वर्ग प्रचंड वाढला. ‘बिग बॉस १६’मध्ये शिव ठाकरे पहिल्या दिवसापासून चर्चेत होता. या घरातील त्याच्या वागणुकीचं त्याच्या खेळाचं सर्वांनी कौतुक केलं. त्यामुळे बिग बॉस १६ ची ट्रॉफी शिवने जिंकावी अशी सर्वांची इच्छा होती. त्यासाठी त्याला त्याच्या चाहत्यांनी तुफान मतंही दिली. आता म्हणूनच शिवने त्याला दिलेल्या या प्रचंड प्रतिसादाबद्दल चाहत्यांचे आभार मानले आहेत.
आणखी वाचा : ‘बिग बॉस १६’नंतर शिव ठाकरे झळकणार मराठी चित्रपटात?, म्हणाला, “मी पाहिलेलं स्वप्न लवकरच…”
इंस्टाग्राम लाईव्हदरम्यान शिव म्हणाला, “बिग बॉसच्या घरामध्ये मला माझ्याकडून गोष्टी बरोबर होत नाहीत तसं वाटायचं. पण मी बाहेर आल्यानंतर तुम्हा सर्वांकडून मिळत असलेलं प्रेम अनुभवलं, आजही अनुभवतोय. तुम्ही मला दिलेली मतं, तुम्ही दर्शवलेला पाठिंबा, तुम्ही माझ्यावर केलेलं भरभरून प्रेम…मंडली या ग्रुपला आणि एका कॉमन मॅनला तुम्ही दिलेला इतका मोठा प्रतिसाद पाहून मी खरोखर भारावून गेलो आहे. मी तुम्हाला वचन देतो की जोपर्यंत शिव ठाकरे जिवंत आहे तोपर्यंत मी कायम तुमच्याबरोबरच असेन.”
दरम्यान ‘बिग बॉस १६’ नंतर शिव ठाकरेला सलमान खानच्या आगामी चित्रपटात काम करण्याची संधी मिळाली आहे असं समोर आलं होतं. त्यामुळे त्याला आता सलमान बरोबर स्क्रीन शेअर करताना बघण्यासाठी त्याचे चाहते उत्सुक आहेत. त्याचप्रमाणे शिव ‘खतरों के खिलाडी’च्या आगामी सिझनमध्ये दिसणार कमेंट बोललं जात आहे.
