‘ठरलं तर मग’ मालिकेत सध्या सायली-अर्जुनमध्ये प्रेम बहरत असल्याचा सीक्वेन्स चालू आहे. या जोडप्याचं कॉन्ट्रॅक्ट मॅरेज असल्याने दोघेही फक्त मधुभाऊ आश्रम केसचा निकाल लागेपर्यंत एकत्र राहायचं असं ठरवतात. परंतु, सायलीचा समजूतदारपणा पाहून अर्जुन हळुहळू तिच्या प्रेमात पडतो. आता तशीच भावना सायलीच्या मनात देखील निर्माण होत असल्याचं पाहायला मिळत आहे.
मालिकेच्या गेल्या काही भागांमध्ये चैतन्य आणि अर्जुनमध्ये पराकोटीचे वाद झाल्याचं आपण पाहिलं. साक्षी आपल्या मित्राची कोणत्याही प्रकारे फसवणूक करू नये हा अर्जुनचा एकमात्र उद्देश असतो. परंतु, साक्षीच्या जाळ्यात ओढल्या गेलेल्या चैतन्यचा कोणावरच विश्वास नसतो. एकीकडे दोन मित्रांचे हे वाद सुरू असताना, दुसरीकडे अर्जुन-सायलीचं नातं आणखी घट्ट होत असल्याचं पाहायला मिळत आहे.
हेही वाचा : शाहरुख खानकडून मराठमोळ्या निलेश साबळेने घेतली ‘ही’ प्रेरणा, किस्सा सांगत भाऊ कदमांशी जोडलं खास कनेक्शन
सायली-अर्जुन लग्नानंतर पहिल्यांदाच एकत्र डेटवर जाणार आहेत. यावेळी नायिका चक्क स्कूटरवरून अर्जुनला १५ मिनिटांच्या डेटवर नेणार आहे. आता या डेटमध्ये काय खास असणार याचा प्रोमो नुकताच सोशल मीडियावर व्हायरल झाला आहे.
मालिकेच्या समोर आलेल्या नवीन प्रोमोमध्ये अर्जुन सायली एकत्र वेळ घालवत असल्याचं पाहायला मिळत आहे. याशिवाय या दोघांनी डेटवर जाऊन खास ‘मुंबई पुणे मुंबई’ चित्रपटातील “कधी तू…” या लोकप्रिय गाण्यावर रोमँटिक डान्स केला. या नव्या प्रोमोचा व्हिडीओ सध्या सोशल मीडियावर तुफान व्हायरल होत आहे.
दरम्यान, गेली अनेक वर्षे प्रेक्षक सायली-अर्जुनमध्ये प्रेम केव्हा बहरणार याची वाट पाहत होते. अखेर मालिकेत या ट्रॅकला आता सुरुवात झालेली आहे. दोघेही एकत्र आल्यावर त्यांच्या कॉन्ट्रॅक्ट मॅरेजचं काय होणार हे पाहणं उत्सुकतेचं ठरणार आहे.
