अंधेरीतील अंबानी रुग्णालयाशेजारी परवडणाऱ्या दरातील सुसज्ज रुग्णालय उभे राहणार, ८५ वर्षे वयाच्या डॉक्टरचा २५ वर्षांचा लढा यशस्वी!

अंधेरी पश्चिम चार बंगला येथील रुग्णालयासाठी राखीव असलेला सुमारे १२ हजार चौरस मीटर इतका भूखंड मिळावा, यासाठी शांताबाई केरकर स्मृती चॅरिटेबल ट्रस्टचे अध्यक्ष व बालरोगतज्ज्ञ डॉ. बळवंत केरकर यांनी १९७९ मध्ये अर्ज केला. मात्र हा भूखंड उद्योग विभागातील कर्मचाऱ्यांच्या वसाहतींसाठी राखीव असल्याचे सांगण्यात आले. १९९१ मध्ये या भूखंडावर रुग्णालय व प्रसुतिगृहाचे आरक्षण ठेवण्यात आले. त्यामुळे ट्रस्टने १९९२ मध्ये पुन्हा अर्ज केला. त्या अर्जाचा विचार झाला नाही. मात्र शिवसेना-भाजप युती शासनाने विख्यात हृदय शल्यविशारद नीतू मांडके यांच्या ट्रस्टला एक रुपया प्रति चौरसमीटर या दराने हा भूखंड ३० वर्षांसाठी भाडेपट्ट्याने दिला. त्यामुळे ट्रस्टने उच्च न्यायालयात आव्हान दिले. न्यायालयाने या वितरणाला स्थगिती दिली. थेट शिवसेनाप्रमुख बाळासाहेब ठाकरे यांनीच मांडके यांची शिफारस केल्यामुळे तत्कालीन मुख्यमंत्री मनोहर जोशी यांनी ट्रस्टची समजूत काढून शेजारील ३७०० चौरस मीटर भूखंड देण्याची तयारी दाखविली. ६ जुलै १९९८ रोजी शांताबाई केरकर ट्रस्टला भूखंड वितरणाचे इरादा पत्र देण्यात आले. मात्र आवश्यक ती कागदपत्रे सादर करूनही २००४ मध्ये वितरण रद्द करण्यात आले. त्यामुळे ट्रस्टने पुन्हा न्यायालयात धाव घेतली. पुन्हा सुनावणी घेण्याचे आदेश न्यायालयाने दिले. परंतु त्यात काहीही झाले नाही.

हेही वाचा – वांद्रे-कुर्ला संकुलात पॉड टॅक्सी आगार उभारणार

ट्रस्टने पुन्हा न्यायालयाचे दार ठोठावले आणि न्या. श्रीमती आर. पी. सोंदूरबलडोटा यांनी १ एप्रिल २०१३ रोजी ट्रस्टच्या बाजूने निकाल देत प्रकल्प अहवाल नव्याने सादर करण्याचे आदेश दिले. मात्र या आदेशाला शासनामार्फत सर्वोच्च न्यायालयात आव्हान देण्यात आले. ती लढाईही डॉ. केरकर जिंकले. अखेर २५ वर्षांनंतर डॉ. केरकर यांनी शांताबाई केरकर मेमोरिअल रुग्णालय आणि सरस्वती देवी कॅन्सर रिचर्स सेंटर या बहुद्देशीय रुग्णालयाची मुहूर्तमेढ रोवली आहे.

हेही वाचा – रोजगार मेळाव्याच्या कार्यक्रमात अनुकंपा तत्वावर नियुक्तीची पत्रे, मध्य रेल्वेतील धक्कादायक प्रकार

टाटा कर्करोग रुग्णालयातील डॉक्टर्स या रुग्णालयाशी संलग्न असणार आहेत. त्यामुळे पश्चिम उपनगरातील कर्करोगग्रस्तांना फायदा होईलच. परंतु परवडणाऱ्या दरात अन्य वैद्यकीय सेवा देणारे हे सुसज्ज रुग्णालय असेल, असा विश्वास डॉ. केरकर यांनी व्यक्त केला आहे.