मुंबई : राज्यात गतवर्षी प्रथमच सुरू करण्यात आलेल्या ॲक्युपंक्चर चिकित्सा पदविका अभ्यासक्रमाच्या प्रवेश प्रक्रियेस सुरुवात झाली असून, विद्यार्थ्यांना ३० ऑक्टोबरपर्यंत अर्ज करता येणार आहे. या अभ्यासक्रमाला प्रवेश घेऊ इच्छिणाऱ्या विद्यार्थ्यांना प्रत्यक्ष महाविद्यालयात जाऊन अर्ज भरायचा आहे. या अभ्यासक्रमाला विज्ञान, वाणिज्य, कला शाखेतून इयत्ता बारावी उत्तीर्ण झालेले विद्यार्थी प्रवेश घेऊ शकतात.
राज्यामध्ये ॲक्युपंक्चर अभ्यासक्रमाचे शास्त्रशुद्ध शिक्षण विद्यार्थ्यांना मिळावे आणि नागरिकांना उत्तम व दर्जेदार उपचार मिळावेत यासाठी महाराष्ट्र ॲक्युपंक्चर परिषदेने राज्यात गतवर्षीपासून ॲक्युपंक्चर महाविद्यालयांना मान्यता देण्यास सुरुवात केली. प्रथम वर्षी १४ महाविद्यालयांना मान्यता देण्यात आली. मात्र मान्यता मिळण्यास झालेला विलंब, आचारसंहिता यामुळे डिसेंबर अखेरीस प्रवेश प्रक्रिया राबविण्यात आली.
प्रवेश प्रक्रियेसाठी कमी वेळ मिळाल्याने ७०० पैकी ४२३ जागांवर विद्यार्थ्यांनी प्रवेश घेतले. मात्र यंदा परिषदेकडून प्रवेश प्रक्रिया वेळेवर सुरू करण्यात आली असून, ३० ऑक्टोबरपर्यंत विद्यार्थ्यांना प्रत्यक्ष महाविद्यालयात जाऊन अर्ज करता येणार आहे. ॲक्युपंक्चर अभ्यासक्रमासाठी १२ वीच्या परीक्षेत ४० गुण मिळून उत्तीर्ण झालेले विज्ञान, वाणिज्य, कला शाखेतील विद्यार्थी प्रवेश घेऊ शकतात.
हा अभ्याक्रम मराठी व इंग्रजी अशा दोन माध्यमातून अभ्यासक्रम शिकविण्यात येणार आहे. या अभ्यासक्रमाला प्रवेश घेण्यासाठी इच्छुक विद्यार्थ्यांना प्रत्यक्ष महाविद्यालयात जाऊन अर्ज नोंदणी करायची असल्याची माहिती महाराष्ट्र ॲक्युपंक्चर परिषदेचे प्रशासक डॉ. रूमी बेरामजी यांनी दिली.
यंदा आणखी चार नवी महाविद्यालये
गतवर्षी राज्यामध्ये प्रथमच अक्युपंक्चर अभ्यासक्रम शिकवण्यासाठी १४ महाविद्यालये सुरू करण्यात आली. ठाणे, पालघर, छत्रपती संभाजी नगर, जालना, बुलढाणा, जळगाव, भंडारा, नागपूर, वाशिम, अहमदनगर, परभणी, अकोला, लातूर आणि सातारा या जिल्ह्यांमध्ये ॲक्युपंक्चर महाविद्यालये सुरू करण्यात आली होती. यंदा त्यामध्ये आणखी चार महाविद्यालयांचा समावेश करण्यात आला आहे. ही महाविद्यालये मुंबईतील माहीम, पंढरपूर, अकोला आणि कोल्हापूर येथे सुरू करण्यात आली आहेत. त्याचप्रमाणे नाशिक येथे आणखी दोन महाविद्यालये सुरू करण्याचा प्रस्ताव असल्याची माहिती महाराष्ट्र ॲक्युपंक्चर परिषदेचे प्रबंधक नारायण नवले यांनी दिली.
किती आहे शुल्क
महाराष्ट्र ॲक्युपंक्चर परिषदेमार्फत राज्यात प्रथमच ॲक्युपंक्चर पदविका अभ्यासक्रम सुरू आला आहे. हा अभ्यासक्रम दोन वर्षांचा असणार आहे. प्रती वर्ष ७५ हजार असे दोन वर्षांसाठी एकूण १ लाख ५० हजार इतके शुल्क परिषदेकडून आकारण्यात आल्याचे नारायण नवले यांनी सांगितले.
विद्यार्थ्यांना संधी ॲक्युपंक्चर उपचार पद्धतीचा दोन वर्षाचा पदविका अभ्यासक्रम पूर्ण करणारा विद्यार्थी हा नोंदणीकृत ॲक्युपंक्चर रोगनिवारणतज्ज्ञ म्हणून काम करू शकेल. जागतिक आरोग्य संघटनेच्या सूचनेनुसार ही तज्ज्ञ व्यक्ती २२० आजारांवर उपचार करू शकते. यामध्ये मानसिक आजार, अस्थिव्यंग आजार, स्नायूंना दुखापत, वेदना आणि मज्जातंतूंशी संदर्भित अनेक आजारांचा समावेश आहे. विद्यार्थ्यांना स्वत:चे स्वतंत्र क्लिनिक सुरू करता येणार आहे. तसेच नव्याने सुरू होणाऱ्या महाविद्यालयांमध्ये शिक्षक म्हणून काम करण्याची संधीही त्यांना उपलब्ध होणार आहे.
