मुंबई : अंधेरीत सोमवारी दोन वेगवेगळ्या ठिकाणी वाहनांनी धडक दिल्यामुळे झालेल्या अपघाता दोघांचा मृत्यू झाला. या अपघातांनंतर दोन्ही वाहनचालक घटनास्थळावरून पळून गेले होते. मात्र एमआयआडीसी पोलिसांनी दोन्ही घटनेतील फरार चालकांना काही तासातच अटक केली.
पहिली घटना सोमवारी सकाळी ११.३० च्या सुमारास महाकाली लेणी रस्त्यावर घडली. कचरा वेचक महिला मरियम्मा हरिजन (६३) चकाला सिग्नलवरून साठे चौकाकडे रस्ता ओलांडून जात होत्या. त्याचवेळी भरधाव वेगात आलेल्या एका डंपरने त्यांना जोरदार धडक दिली. या धडकेमुळे मरियम्मा खाली कोसळल्या आणि त्यांच्या डोक्याला गंभीर दुखापत झाली.
प्रत्यक्षदर्शींनी दिलेल्या माहितीनुसार डंपर चालकाने कोणतीही मदत न करता, आपले वाहन तिथेच सोडून पळ काढला. मरियम्मा यांना कूपर रुग्णालयात दाखल केले. मात्र, डॉक्टरांनी त्यांना उपचारापूर्वीच मृत घोषित केले. या प्रकरणी एमआयडीसी पोलिसांनी डंपर चालक अनुजकुमार सरोज (३३) याला अटक केली.
दुसरी घटना सायंकाळी सव्वाचारच्या सुमारास घडली. अमोल मगर (२४) हा एका खासगी कंपनीत स्वच्छतेचे काम करत होता. दुपारी ३.३० वाजता त्याने घरी परत येत असल्याचे पत्नीला कळवले. तो जोगेश्वरी – विक्रोळी लिंक रस्त्यावरील वेदान्त पेट्रोल पंपाजवळून पायी जात असताना, मागून आलेल्या एका टेम्पोने त्याला धडक दिली. या धडकेमुळे अमोल खाली पडला आणि त्याच्या डोक्याला गंभीर दुखापत झाली. टेम्पो चालकही तात्काळ घटनास्थळावरून फरार झाला. अमोलला कूपर रुग्णालयात नेण्यात आले. पण सायंकाळी ६ वाजता डॉक्टरांनी त्याला मृत घोषित केले.
दोन्ही घटनेतील फरार चालकांना अटक
एमआयडीसी पोलिसांनी तांत्रिक तपास आणि माहितीच्या आधारे दोन्ही प्रकरणातील फरार चालकांना काही तासांतच शोधून काढले. दुसऱ्या घटनेतील आरोपी, राजू यादव (२६) यालाही अटक करण्यात आली. दोन्ही आरोपींवर निष्काळजीपणामुळे वाहन चालवून मृत्यूस कारणीभूत झाल्याप्रकरणी गुन्हा दाखल करण्यात आला आहे. दोन्ही चालकांना कायदेशीर नोटीस बजावण्यात आली आहे, असे एमआयडीसी पोलिसांनी सांगितले.
