मुंबई गणेशोत्सव २०२५ : सार्वजनिक गणेशोत्सव मंडळांना बेस्टची वीज

बेस्टच्या मार्गप्रकाश विभागाने मुंबई महानगरपालिकेच्या आदेशानुसार मिरवणूक मार्गावरील व विसर्जनस्थळांवरील प्रकाश योजनेची सुरक्षिततेच्या दृष्टिने आखणी केली आहे. बेस्ट उपक्रमाने मुंबई शहरात गणेशभक्तांसाठी ७१ मिरवणूक मार्ग, १९ विसर्जनस्थळे आणि ३९ कृत्रिम तलाव येथे २,७२३ दिवे लावण्याची तयारी केली आहे. विसर्जनस्थळांवर सुयोग्य प्रकाश व्यवस्थेकरीता एकूण १५ स्थायी विद्युत मनोऱ्याची उभारणी केली आहे. यासह प्रचंड गर्दीच्या ठिकाणी आपत्कालीन परिस्थितीत विद्युतपुरवठा सुरळीत ठेवण्यासाठी विसर्जनस्थळांवर पर्यायी वीजपुरवठ्याकरिता एकूण ८ डिझेल जनित्र संचाची व्यवस्था करण्यात येणार आहे. तसेच गणेश भक्तांसाठीची बस वाहतूक व्यवस्था केली आहे, अशी माहिती बेस्ट उपक्रमाद्वारे देण्यात आली.

जीवरक्षकासाठी शोधप्रकाश दिव्यांची व्यवस्था

समुद्रात विसर्जन करताना आपत्कालीन प्रसंग उद्भवल्यास, बुडणाऱ्यांना वाचविण्यासाठी जीवरक्षक दलास मदत म्हणून समुद्रात खोलवर प्रकाश पोहोचण्यासाठी एकूण १९ उच्च क्षमतेचे झोत असलेले शोधप्रकाश (सर्चलाईट) दिव्यांची व्यवस्था करण्यात येणार आहे. विसर्जन स्थळांवरील वीज पुरवठा सुरळीत व अखंडीतपणे चालू ठेवण्यासाठी अधिकारी व कर्मचारी यांची नेमणूक करण्यात येणार आहे.

बेस्ट उपक्रमाच्या संकेतस्थळावर माहितीपुस्तिका

मुंबई शहर हद्दीत साजरा करण्यात येणाऱ्या सार्वजनिक गणेशोत्सवाच्या अनुषंगाने दरवर्षी सार्वजनिक गणेशोत्सव मंडळे, तसेच मुंबईकरांच्या माहितीसाठी बेस्ट उपक्रमाच्या मार्गप्रकाश विभागातर्फे माहितीपुस्तिका २० ऑगस्ट २०२५ रोजी प्रकाशित करण्यात आली. विद्युत रोषणाईसाठी गणेशोत्सव मंडळांना तात्पुरता वीजपुरवठा मिळण्यासाठी अर्जदारांनी पूर्ण करावयाच्या नियम व अटींच्या सर्व सूचना माहिती पुस्तिकेद्वारे दिली आहे. यासह बेस्टच्या मार्गप्रकाश विभागाने मिरवणूक मार्गावरील व विसर्जनस्थळांवरील प्रकाश योजनेची माहिती, गणेश भक्तांसाठीची बस वाहतूक व्यवस्था यासंदर्भातील संपूर्ण माहिती पुस्तिकेच्याद्वारे प्रदर्शित केली आहे. ही पुस्तिका बेस्ट उपक्रमाच्या संकेतस्थळावर देखील उपलब्ध आहे, असे बेस्ट उपक्रमाकडून सांगण्यात आले.