मुंबई : महानगरपालिकेच्या आरोग्य विभागातर्फे ६ ते २० नोव्हेंबर २०२५ दरम्यान सर्व रुग्णालये व आरोग्य संस्थांमध्ये ‘स्वच्छता पंधरवडा’ राबविण्यात येणार आहे. या पंधरवड्यानंतर सर्व संस्थांचे मूल्यांकन व श्रेणीकरण करण्यात येणार आहे. स्वच्छता, कचरा व्यवस्थापन, नवकल्पना आणि सार्वजनिक सहभाग या निकषांवर आधारित मूल्यांकनानुसार उत्कृष्ट कामगिरी करणाऱ्या रुग्णालयांचा गौरव करण्यात येणार आहे.
मुंबई महानगरपालिकेच्या रुग्णालयातील आरोग्य सेवांबाबत नागरिकांचा विश्वास अधिक बळकट व्हावा यासाठी रुग्णालयात स्वच्छता, निर्जंतुकीकरण आणि सुंदर वातावरण राखण्याचे निर्देश मुंबई महानगरपालिका आयुक्त आणि प्रशासक भूषण गगराणी यांनी दिले आहेत. त्यादृष्टीने मुंबई महानगरपालिकेच्या रुग्णालयांमध्ये ६ ते २० नोव्हेंबरदरम्यान स्वच्छता पंधरवड्याचे आयोजन करण्यात येणार आहे. यामध्ये आरोग्य संस्थांमधील स्वच्छता पातळी उंचावणे, कचरा व्यवस्थापन सुधारणा करणे, संक्रमण नियंत्रणावर भर देणे, तसेच कर्मचारी, रुग्ण आणि नागरिकांमध्ये स्वच्छतेबाबत जागरूकता निर्माण करण्यात येणार आहे. या कालावधीत आरोग्य विभागामार्फत रुग्णालय कार्यालय, वसतिगृहे, चौक्या, उपहारगृहे, भांडारकक्ष, रुग्णालय अंतर्गत पदपथ इत्यादी ठिकाणी संपूर्ण स्वच्छता मोहीम राबविण्यात येणार आहे. त्यासोबतच निर्जंतुकीकरण, कचरा वर्गीकरण, कचऱ्याची विल्हेवाट व्यवस्था, शून्य राडारोडा, भंगार यावर लक्ष केंद्रीत करून कारवाई करण्यात येणार आहे. रुग्णालयातील उपलब्ध यंत्रणा, कर्मचारी यांच्यामार्फत संयुक्त मोहीम राबविण्यात येणार आहे.
या मोहिमेच्या अनुषंगाने रुग्णालय आणि दवाखान्यांचा प्रत्येक आठवड्याचा प्रगती अहवाल आणि उपक्रमातील कृतींचे दस्तावेजीकरण करण्यात येईल. संपूर्ण मोहिमेनंतर सर्व संस्थांचे मूल्यांकन आणि श्रेणीकरण करण्यात येईल. स्वच्छता, कचरा व्यवस्थापन, नवकल्पना आणि सार्वजनिक सहभाग या निकषांवर आधारित मूल्यांकनानुसार उत्कृष्ट कामगिरी करणाऱ्या रुग्णालयांना प्रशस्तिपत्र देऊन गौरविण्यात येणार आहे. मुंबई महानगरपालिकेच्या आरोग्य सेवेचा दर्जा उंचवण्याच्या अनुषंगाने एकत्रितपणे ही मोहीम राबवण्याच्या सूचना अतिरिक्त महानगरपालिका आयुक्त (पश्चिम उपनगरे) डॉ. विपिन शर्मा यांनी दिल्या आहेत.
स्वच्छता मोहिमेच्या यशासाठी महानगरपालिकेच्या आरोग्य क्षेत्रातील सर्व रुग्णालये, संस्था, विभागातील विद्यमान मनुष्यबळ आणि उपलब्ध संसाधनांचा अधिकाधिक उपयोग करून मोहीम यशस्वी करण्याचे आवाहन उपायुक्त (सार्वजनिक आरोग्य) शरद उघडे यांनी केले.
अन्य विभागांची मदत घेणार
या उपक्रमाच्या प्रभावी अंमलबजावणीसाठी संबंधित सहायक आयुक्त, विभागातील घनकचरा व्यवस्थापन विभाग, परिरक्षण विभाग, कीटकनियंत्रण विभाग, अतिक्रमण निर्मूलन विभाग, उद्यान विभाग इत्यादींची मदत घेण्यात येणार आहे. मुंबई महानगरपालिका रुग्णालयांचे अधीक्षक, वैद्यकीय अधिष्ठाता व वैद्यकीय अधिकारी यांच्या मार्गदर्शनाखाली ही मोहीम राबविण्यात येणार आहे. तसेच स्थानिक सेवाभावी संस्थाचीही मदत घेण्यात येणार आहे.
