मध्य रेल्वेच्या स्थानकांवर वैद्यकीय केंद्राची वानवा; आपत्कालीन वैद्यकीय केंद्र फक्त चार स्थानकात…

मुंबईतील मध्य रेल्वे स्थानकांवर वैद्यकीय सेवा पुरवण्यासाठी निविदा काढल्या असूनही प्रतिसाद मिळत नसल्याने प्रवाशांना वेळेत वैद्यकीय सेवा मिळत नाही.

Written by लोकसत्ता टीम

मुंबई

Updated: September 17, 2025 22:12 IST

central railway lacks medical care at stations mumbai

मध्य रेल्वेच्या बहुतेक स्थानकांवर प्रवाशांसाठी आरोग्य सेवा नाहीच. (प्रातिनिधिक छायाचित्र)

मुंबई : अमृत भारत योजनेत स्थानकांचे सुशोभीकरण करण्यात आले असली तरी आवश्यक पायाभूत सुविधांची मात्र वानवा आहे. मध्य रेल्वे मार्गावरील शेकडो स्थानकांपैकी फक्त चार स्थानकात आपत्कालीन वैद्यकीय केंद्रे उपलब्ध आहेत. त्यामुळे इतर स्थानकांत प्रवाशांना वैद्यकीय उपचाराची आवश्यकता भासल्यास त्यांना वेळेत सेवा मिळत नसल्याचे दिसून येत आहे.

अमृत भारत स्थानक योजनेंतर्गत मध्य रेल्वेच्या स्थानकांचे सुशोभीकरण करण्याबरोबरच सुविधा उपलब्ध करून देण्यात आल्या. सीसीटीव्ही कॅमेरे, पिण्याची पाण्याची सुविधा, विद्युत दिवे, शौचालये, स्थानकावरील फलाटाचे काम, सीमा भिंत उभी करणे, पादचारी पुलाच्या जिन्यांची सुधारणा, सुरक्षा भिंतीवर थ्रीडी चित्रे अशा अनेक गोष्टी स्थानकांवर करण्यात आल्या होत्या. परंतु, वैद्यकीय सेवेचा अभाव असल्याने वैद्यकीय सुविधेची आवश्यकता भासणाऱ्या प्रवाशांची सुरक्षा आणि आरोग्य धोक्यात येण्याची भीती आहे.

माहिती अधिकार कार्यकर्ते समीर झवेरी यांनी रेल्वेमंत्री आश्विनी वैष्णव मध्य रेल्वेच्या महाव्यवस्थापक यांच्याशी पत्रव्यवहार केला होता. वारंवार प्रयत्न करूनही मध्य रेल्वेच्या मुंबई विभागाला त्यांच्या रेल्वे स्थानकांवर आपत्कालीन वैद्यकीय सेवा (ईएमएस) उपलब्ध करून देणे शक्य झालेले नाही. वैद्यकीय सुविधा वाढविण्यासाठी सातत्याने निविदा काढण्यात आल्या. मात्र, कमी प्रतिसाद मिळाल्यामुळे इतर स्थानके आपत्कालीन वैद्यकीय केंद्रापासून वंचित राहिली आहेत, अशा आशयाचे उत्तर त्यांना मध्य रेल्वेकडून देण्यात आले.

हेही वाचा

Train Fire: बलसाड फास्ट पॅसेंजरच्या इंजिनला आग; प्रवासी सुरक्षित

मध्य रेल्वेवरून दररोज सुमारे ४० लाख प्रवाशांचा प्रवास होतो. यावेळी अनेक प्रवाशांना चक्कर येणे, डोके दुखणे व इतर अत्यावश्यक वैद्यकीय सेवेची आवश्यकता असते. तसेच विविध आजारांनी बाधित असलेल्या प्रवाशांचा प्रवास लोकलने होतो. अशा प्रवाशांना वैद्यकीय सेवा वेळेत मिळणे आवश्यक आहे. यासाठी सर्व स्थानकात आपत्कालीन वैद्यकीय केंद्र सुरू होणे आवश्यक आहे.

निविदेला वारंवार मुदतवाढ

स्थानकांवर आरोग्य सुविधा उपलब्ध करून देण्यासाठी २४ मार्च रोजी १५ स्थानकांवर ईएमआर सुविधेसाठी काढलेली निविदा २३ एप्रिल रोजी उघडण्यात आली. तेव्हा त्याला कोणताही प्रतिसाद मिळाला नाही. ८ मे रोजी २३ स्थानकांसाठी दुसऱ्या प्रयत्नात फक्त एकच निविदा काढण्यात आली. जी तांत्रिक दोषांमुळे नाकारावी लागली.

३० जून रोजी पुन्हा २३ स्थानकांसाठी तिसरी निविदा काढण्यात आली. ज्या निविदा ३१ जुलै रोजी उघडण्यात आल्या. या काळात, कंत्राटे देण्याची जबाबदारी अधिकृतपणे मुंबई विभागाच्या वाणिज्य विभागाकडे हस्तांतरित करण्यात आली.