लालबागचा राजा, चिंचपोकळीचा चिंतामणीच्या दर्शनाला जाणाऱ्यांसाठी विशेष सोय;गणेशोत्सवानिमित्त मध्य रेल्वेवर विशेष व्यवस्था

भारतीय रेल्वेने गणेश उत्सवाच्या काळात प्रवाशांच्या आरामदायी व सुरळीत प्रवासाकरिता विशेष व्यवस्था केल्या आहेत. गणेशोत्सवानिमित्त प्रवाशांच्या सोयीसाठी आतापर्यंत ३८० गणेशोत्सव विशेष गाड्यांच्या सेवांची घोषणा केली आहे.तर मध्य रेल्वेने विशेष व्यवस्था उपलब्ध केली आहे. छत्रपती शिवाजी महाराज टर्मिनस, दादर, लोकमान्य टिळक टर्मिनस, ठाणे व पनवेल स्थानकांवर ३० ऑगस्टपर्यंत प्रत्येक बाबीचा आढावा घेण्यासाठी अधिकारी नियुक्त केले आहेत.

१८० तिकीट तपासणीस कर्मचारी तैनात

गणेशोत्सवातील प्रवाशांची वर्दळ सुरळीत ठेवण्यासाठी छत्रपती शिवाजी महाराज टर्मिनस, दादर, लोकमान्य टिळक टर्मिनस, ठाणे व पनवेल स्थानकांवर वाणिज्यिक निरीक्षक नियुक्त केले आहेत. तसेच गर्दी नियंत्रणासाठी सुमारे १८० तिकीट तपासणीस कर्मचारी तैनात केले आहेत. तसेच मुंबईतील स्थानकावर गर्दीवर नियंत्रण मिळविण्यासाठी आणि गणेश भक्तांचा प्रवास सुरळीत होण्यासाठी विशेष पथक तैनात केले आहेत. प्रवाशांना तिकिटे काढण्यासाठी जादा तिकीट खिडक्या उपलब्ध करून दिल्या आहेत.

गणेशभक्तांसाठी विशेष सोय

लालबागचा राजा, चिंचपोकळीचा चिंतामणीच्या दर्शनाला जाण्यासाठी गणेश भक्त करी रोड आणि चिंचपोकळी स्थानकाचा सर्वाधिक वापर करतात. त्यामुळे या स्थानकात चढणाऱ्या आणि उतरणाऱ्या प्रवाशांसाठी विशेष सोय केली आहे. चिंचपोकळी, करी रोड, भायखळा, परळ, दादर, कॉटन ग्रीन, वडाळा रोड, ठाणे व पनवेल स्थानकांवर अतिरिक्त तिकीट सुविधा उपलब्ध करून देण्यासाठी ३० मोबाइल-यूटीएस यंत्रणा वितरित केल्या आहेत. चिंचपोकळी, करी रोड, भायखळा, परळ, दादर व कॉटन ग्रीन स्थानकांवर २७ ऑगस्टपासून दहा दिवसांसाठी मोबाईल-यूटीएस व यूटीएस ॲप प्रचार पथक तैनात करण्यात येणार आहे. यासह या स्थानकांवर प्रवाशांच्या सोयीसाठी अतिरिक्त सहाय्यक नियुक्त केले जाणार आहेत. चिंचपोकळी व करी रोड स्थानकांवर दिवसरात्र अतिरिक्त तिकीट तपासणी कर्मचारी तैनात करण्यात आले आहेत. तसेच या दोन स्थानकात २७ ऑगस्ट रोजीपासून प्रत्येकी दोन अतिरिक्त यूटीएस खिडक्या सुरू केल्या आहेत.

नियमित घोषणा व माहिती

छत्रपती शिवाजी महाराज टर्मिनस, दादर, ठाणे, लोकमान्य टिळक टर्मिनस, दिवा, कल्याण आणि पनवेल स्थानकांवरील प्रमुख ठिकाणी गणेशोत्सव विशेष रेल्वेगाड्यांचे फलक लावण्यात आले आहेत. नियमित घोषणा योग्यरित्या होण्यासाठी, मुख्य वाणिज्यिक निरीक्षक मध्यवर्ती घोषणा कक्षात तैनात राहणार आहेत. गणेशोत्सव विशेष रेल्वे गाड्यांची माहिती स्थानकावरील चौकशी खिडकीवरून देण्यात येणार आहे. तसेच, भारतीय रेल्वेच्या संकेतस्थळावर, एनटीईएस ॲपवरून विशेष रेल्वेगाड्यांची माहिती उपलब्ध होईल. यासह विशेष रेल्वे गाड्यांचे सविस्तर वेळापत्रक आयआरसीटीसी संकेतस्थळावर, रेलवन ॲपवर व संगणकीकृत पीआरएसमध्येही उपलब्ध आहे, अशी माहिती मध्य रेल्वे प्रशासनाने दिली आहे.