मुंबई : मध्य रेल्वेच्या मुंबई विभागातील रेल्वे रूळ, ओव्हर हेड वायर, सिग्नल यंत्रणेची देखभाल-दुरूस्ती करण्यासाठी विविध अभियांत्रिकी आणि पायाभूत कामांकरीता रविवारी ब्लॉक घेण्यात येणार आहे.
मध्य रेल्वे
मुख्य मार्ग
कुठे : सीएसएमटी – विद्याविहारदरम्यान अप आणि डाऊन धीम्या मार्गावर
कधी : सकाळी १०.५५ पासून दुपारी ३.५५ पर्यंत
परिणाम : सीएसएमटीवरून सकाळी १०.४८ ते दुपारी ३.४५ दरम्यान सुटणाऱ्या डाऊन धीम्या मार्गावरील लोकल सीएसएमटी – विद्याविहार स्थानकांदरम्यान डाऊन जलद मार्गावर वळवण्यात येणार आहेत. या लोकल भायखळा, परळ, दादर, माटुंगा, शीव आणि कुर्ला स्थानकांवर थांबतील आणि पुढे विद्याविहार स्थानकादरम्यान डाऊन धीम्या मार्गावर वळवण्यात येतील. घाटकोपरवरून सकाळी १०.१९ ते दुपारी ३.५२ दरम्यान सुटणाऱ्या अप धीम्या लोकल विद्याविहार – सीएसएमटी स्थानकांदरम्यान अप जलद मार्गावर वळवण्यात येतील. या लोकल कुर्ला, शीव, माटुंगा, दादर, परळ आणि भायखळा स्थानकांवर थांबतील.
हार्बर मार्ग
कुठे : सीएसएमटी – चुनाभट्टी / वांद्रे अप आणि डाऊन मार्गावर
कधी : सकाळी ११.१० – दुपारी ४.४० दरम्यान
परिणाम : ब्लाॅक कालावधीत सीएसएमटी – वांद्रे अप आणि डाऊन मार्गावरील लोकल सेवा रद्द करण्यात येणार आहे. तर, सीएसएमटी – वाशी/बेलापूर/पनवेल अप आणि डाऊन मार्गावरील लोकल सेवा रद्द करण्यात येणार आहे. ब्लाॅक कालावधीत पनवेल – कुर्ला (फलाट क्रमांक ८) दरम्यान विशेष लोकल धावतील. सकाळी १० ते सायंकाळी ६ पर्यंत हार्बर मार्गावरील प्रवाशांना मुख्य आणि पश्चिम रेल्वे मार्गावरून प्रवास करण्याची मुभा असेल.
