मुंबई : मुंबईतील डबेवाल्यांना ५०० चौरस फुटांचे घर केवळ २५.५० लाख रुपयांत उपलब्ध करून देण्याची घोषणा मुख्यमंत्री देवेंद्र फडणवीस यांनी गुरुवारी केली. पंतप्रधान आवास योजना आणि इतर शासकीय योजनांच्या माध्यमातून हा परवडणारा गृहनिर्माण प्रकल्प राबविण्यात येणार असल्याचे त्यांनी सांगितले. वांद्रे पश्चिम येथे डबेवाला आंतरराष्ट्रीय अनुभव केंद्राच्या उद्घाटनप्रसंगी ते बोलत होते.
गेल्या १३५ वर्षांच्या प्रवासात आमचे डबेवाले संगणक किंवा ‘आर्टिफिशियल इंटेलिजन्स’ न वापरता मानवी बुद्धिमत्तेच्या जोरावर जगप्रसिद्ध व्यवस्थापन कौशल्य दाखवत आहेत. ही जगातली अद्वितीय परंपरा आहे. ‘डबेवाला भवन’चे रूपांतर आंतरराष्ट्रीय अनुभव केंद्रात झाल्यामुळे आणि येथे ‘व्हर्च्युअल रिअॅलिटी’च्या माध्यमातून सकाळच्या भजनापासून लोकल प्रवास, डबे वितरित करणे आणि जेवणापर्यंत असा डबेवाला संस्कृतीचा थेट अनुभव घेता येत असल्याचे सांगत मुख्यमंत्र्यांनी डबेवाल्यांचे कौतुक केले.
फडणवीस यांनी डबेवाल्यांच्या गृहनिर्माण प्रकल्पासाठी जमीन उपलब्ध करून देणारे त्रिपाठी यांचे, तसेच नफा न घेता उत्कृष्ट दर्जाचे बांधकाम करण्याची जबाबदारी स्वीकारणारे जयेश शाह यांचे कौतुक केले. या प्रसंगी सांस्कृतिक कार्यमंत्री आशीष शेलार, आमदार श्रीकांत भारतीय, योगेश सागर, तमिळ सेल्वन यांच्यासह ‘नूतन मुंबई टिफिन बॉक्स सप्लायर चॅरिटी ट्रस्ट’चे अध्यक्ष उल्हास मुके, ‘मुंबई टिफिन बॉक्स सप्लायर असोसिएशन’चे अध्यक्ष रामदास करवंदे, सचिव किरण गवांदे आदी या वेळी उपस्थित होते.
मुंबईसाठी अभिमानाचा क्षण : आशीष शेलार
विठ्ठलाचे नाव घेत लोकांच्या पोटापाण्याची सेवा करणाऱ्या डबेवाल्यांचे आंतरराष्ट्रीय अनुभव केंद्र उभे राहणे हा मुंबईकरांसाठी अभिमानाचा क्षण असल्याचे सांस्कृतिक कार्यमंत्री आशिष शेलार यांनी सांगितले. हे केंद्र जगभरातील पर्यटकांना प्रेरणा आणि व्यवस्थापनाचे धडे देणारे केंद्र ठरून मुंबईची ओळख द्विगुणित करेल, असा विश्वास त्यांनी व्यक्त केला.
डबेवाला समाजाची निर्व्यसनी, वारकरी परंपरेवर आधारित सेवा ही जगभरासाठी प्रेरणादायी आहे. पुढील काळात आंतरराष्ट्रीय अनुभव केंद्रासाठी अधिक चांगल्या सुविधा उपलब्ध करून देणार. – देवेंद्र फडणवीस, मुख्यमंत्री
