कूपर रुग्णालयामध्ये कंत्राटी कर्मचाऱ्यांचे काम बंद आंदोलन; सकाळपासून रुग्णसेवा विस्कळीत…

सलग चार महिने वेतन न मिळाल्याने कर्मचाऱ्यांनी आक्रमक पवित्रा घेतला. या आंदोलनामुळे रुग्णालयातील रुग्ण सेवेवर परिणाम झाला असून, कर्मचाऱ्यांअभावी काही शस्त्रक्रिया पुढे ढकलण्याची नामुष्की रुग्णालय प्रशासनावर ओढवली.

कूपर रुग्णालयामध्ये बहुउद्देशीय कर्मचारी पुरविण्याचे कंत्राट मे. के. एच. एफ. एम हॉस्पिटॅलिटी व फॅसिलिटी मॅनेजमेंट सर्व्हिसेस लिमिटेड या कंत्राटादराना देण्यात आले आहे. या कंत्राटदारामार्फत रुग्णालयामध्ये सेवा पुरविणाऱ्या कर्मचाऱ्यांना मागील चार महिन्यांपासून वेतन देण्यात आलेले नाही. त्यामुळे या कर्मचाऱ्यांनी मंगळवारी अचानक काम बंद आंदोलन पुकारले. त्यामुळे रुग्णालयातील कामावर परिणाम झाला असून, रुग्ण सेवा विस्कळीत झाली आहे.

शस्त्रक्रियागृहामध्ये बहुउद्देशीय कर्मचाऱ्यांच्या अनुपस्थितीमुळे साफसफाईची कामे होऊ शकली नाहीत. परिणामी, काही शस्त्रक्रिया पुढे ढकलाव्या लागल्या. त्याचप्रमाणे पॅथोलॉजी विभागामध्येही रक्ताच्या नमून्यांची देवाणघेवाण करण्यासाठी कर्मचारी उपलब्ध नव्हते, सकाळी रुग्णालयातील साफसफाई झाली नाही. याचा परिणाम रुग्णालयातील रुग्ण सेवेवर झाला आहे.

मे. के. एच. एफ. एम हॉस्पिटॅलिटी व फॅसिलिटी मॅनेजमेंट सर्व्हिसेस लिमिटेड या कंत्राटदाराकडून सेवा पुरविण्याकडे दुर्लक्ष करण्यात येत होते. रुग्णालयातील विविध विभाग, परिसर, स्वच्छतागृहे, व्हरांडा, जिन्यांच्या सफाईसाठी कंत्राटदाराकडून पुरेसे कर्मचारी उपलब्ध न करणे, फिनेल, साबण, हायड्रोक्लोरिक ॲसिड, टॉयलेट ब्रशचा वापर न करणे अशा तक्रारी येत असल्याने अकार्यकारी अधिष्ठाता डॉ. सुधीर मेढेकर यांनी कारणे दाखवा नोटीस बजावत कंत्राटदारावर कारवाई करण्याची शिफारस वैद्यकीय शिक्षण संचालक व मुंबई महानगरपालिका उपायुक्तांकडे केली होती.

मात्र त्याकडे दुर्लक्ष केल्याने काही दिवसांपूर्वी रुग्णालयामध्ये उंदरांचा सुळसुळाट झाला. उंदरांनी रुग्णांचा चावा घेतल्यानंतर रुग्णालय प्रशासन खडबडून जागे झाले. मात्र नाममात्र दंड ठोठावून कंत्राटदाराला मुंबई महानगरपालिका प्रशासनाने अभय दिले. कंत्राटदाराने कर्मचाऱ्यांना मागील चार महिन्यांचे वेतन दिलेले नाही. त्यामुळे संतप्त कर्मचाऱ्यांनी मंगळवारी काम बंद आंदोलन पुकारल्याने पुन्हा रुग्णसेवा विस्कळीत झाली आहे.

कूपर रुग्णालय प्रशासनाकडून कंत्राटदाराला सर्व महिन्याचे वेतन देण्यात आले आहे. कंत्राटदाराने कर्मचाऱ्यांना वेतन दिलेले नाही. मात्र दुपारपर्यंत त्यांच्या बँक खात्यात वेतन जमा होईल. – नीलम अंद्राडे, अधिष्ठाता, कूपर रुग्णालय.