Loksatta Durga Award 2025: दुर्गा पुरस्कारांची अंतिम निवड प्रक्रिया पूर्ण

प्रतिकूलतेवर मात करून अतुलनीय कार्य करून स्वत:च्या कार्यकर्तृत्वाचा ठसा समाजावर उमटवणाऱ्या, संशोधन करून नवनवे शोध लावणाऱ्या, आणि विविध क्षेत्रांत समाजिक कार्य करणाऱ्या स्त्रियांनी या पुरस्कारासाठी प्रस्ताव पाठवले होते. राज्यभरातून याला भरघोस प्रतिसाद मिळाला. या पुरस्कारांसाठी आलेल्या ४५० नामांकनांतून दोन कठोर चाळण्यांनंतर महत्त्वाच्या निकषांच्या आधारे नऊ स्त्रियांची ‘लोकसत्ता दुर्गा पुरस्कार २०२५’साठी निवड करण्यात आली आहे. यातील अनेक जणींनी कौटुंबिक, वैयक्तिक आणि सामाजिक स्तरावर उत्तम कार्य करून दाखवले आहे. आपल्या कार्यात त्यांनी अनेक स्त्रियांनाही मदतीचा हात दिला आहे. तसेच अनेक अडचणींवर मात करून समाजात स्वत:चे स्थान निर्माण केले आहे. अंतिम निवड झालेल्या दुर्गांची नावे आणि त्यांच्या समाजातील प्रेरणादायी योगदानाची माहिती नवरात्रोत्सवात वाचकांना करून दिली जाणार आहे. घटस्थापनेपासून (सोमवार, २२ सप्टेंबर) दररोज एक याप्रमाणे नऊ दिवस ही माहिती प्रसिद्ध केली जाणार आहे.

यंदाचा ‘लोकसत्ता दुर्गा पुरस्कार’ विजेत्या नऊ दुर्गांचा सत्कार लवकरच एका शानदार सोहळ्यात नामवंतांच्या हस्ते केला जाणार आहे. हा कार्यक्रम सर्वांसाठी खुला असणार आहे.

‘लोकसत्ता दुर्गां’च्या परीक्षक

स्त्रीमुक्ती चळवळीच्या कार्यकर्त्या शारदा साठे यांनी गेली ६० वर्षे विविध चळवळींच्या माध्यमातून स्त्रीवादी विचारांचा पुरस्कार केला आहे. ‘प्रेरक ललकारी’ या मासिकाच्या त्या २७ हून अधिक वर्षे संपादक असून अनेक नामवंत लेखकांच्या पुस्तकांचे त्यांनी अनुवाद केले आहेत.

सुषमा देशपांडे या पत्रकार, लेखिका, मराठी आणि हिंदी रंगभूमीवरील बहुगुणी कलाकार आहेत. अनेक नाटक आणि चित्रपटांसह त्यांनी ‘व्हय मी सावित्रीबाई’ या नाटकाचे लेखन, दिग्दर्शन व अभिनयही त्यांनी केला आहे. या नाटकासाठी त्यांना महाराष्ट्र सरकारचा पुरस्कार मिळाला आहे. तसेच त्यांना ‘महाराष्ट्र फाउंडेशन’ आणि ‘पुणे नाट्य परिषदे’चा ‘दया पवार स्मृती पुरस्कार’ही मिळाला आहे.

‘संगीत नाटक अकादमी’ पुरस्कार विजेत्या मीना नाईक या सुप्रसिद्ध कठपुतळी कलाकार, बालनाट्य दिग्दर्शक, अभिनेत्री आणि वेशभूषाकार आहेत. त्या सक्रिय सामाजिक कार्यकर्त्या असून बाल-हक्क आणि बाल लैंगिक शोषण या क्षेत्रात काम केले आहे. त्याच सामाजिक जाणिवेतून त्या ‘वाटेवरती काचा गं’ आणि ‘अभया’सारख्या कलाकृती लोकांसमोर मांडत आहेत.

● मुख्य प्रायोजक : ग्रॅव्हिटस फाउंडेशन

● सहप्रायोजक : टीजेएसबी सहकारी बँक लिमिटेड, वैभवलक्ष्मी डेव्हलपर्स, मे. बी. जी. चितळे डेअरी, केसरी टूर्स, पितांबरी प्रोडक्ट्स प्रायव्हेट लिमिटेड, व्ही एम मुसळुणकर ज्वेलर्स, ठाणे भारत सहकारी बँक लिमिटेड

● पॉवर्ड बाय : डीडीएसआर ग्रुप, चैतन्य अस्सल मालवणी भोजनगृह आणि क्रेडाई एम सी एच आय ठाणे रासरंग