मुंबई : मागील दोन दिवसांपासून राज्यात पावसाचा जोर वाढला आहे. मुंबईतही पावसाची रिपरिप सुरु आहे. दरम्यान, कोकणातील रायगड, रत्नागिरी, सिंधुदुर्ग जिल्ह्यात बुधवारी अतिमुसळधार पावसाचा अंदाज व्यक्त करण्यात आला आहे. तर उर्वरीत भागात मुसळधार पावसाची शक्यता आहे.राज्यात आजही सर्वत्र पाऊस पडला. गेल्या आठवड्यात संपूर्ण राज्यात पावसाचा फारसा जोर नव्हता. त्यानंतर मागील दोन दिवसांपासून राज्यात पाऊस पुन्हा सक्रिय झाला आहे.
मुंबई शहर तसेच उपनगरांतही सोमवारपासून पाऊस पडत आहे. त्यामुळे मुंबईकरांना काहिसा दिलासा मिळाला आहे. हवामान विभागाच्या कुलाबा केदं्रात मंगळवारी सकाळी ८:३० ते सायंकाळी ५:३० पर्यंत ६ मिमी तर, सांताक्रूझ केंद्रात १७.५ मिमी पावसाची नोंद झाली. दरम्यान, हवामान विभागाने दिलेल्या माहितीनुसार, पावसाला पोषक वातावरण निर्माण झाल्यामुळे तसेच बंगालच्या उपसागरावर तयार झालेल्या वाऱ्यांच्या चक्राकार स्थितीमुळे परिसरात कमी दाबाचा पट्टा तयार होत आहे. त्यामुळे पुढील चार ते पाच दिवस कोकण किनारपट्टीसह विदर्भात पावसाचा जोर कायम राहणार असल्याचा अंदाज आहे. याचबरोबर मराठवाड्यातील काही भागात मेघगर्जनेसह पावसाची शक्यता आहे.
गेल्या २४ तासांत सर्वत्र मुसळधार
राज्यात सोमवारी सकाळी ८:३० ते मंगळवारी सकाळी ८:३० पर्यंत राज्यातील अनेक भागात मुसळधार पावसाची नोंद झाली आहे. यामध्ये प्रामुख्याने मुरुड येथे १०८ मिमी, म्हसळा ८० मिमी, सोनपेठ १७५ मिमी, कुडाळ १०४ मिमी, सावंतवाडी ९८ मिमी, राजापूर ६६ मिमी, गुहागर ७४ मिमी पावसाची नोंद झाली. मराठवाड्यातही गेल्या २४ तासांत मुसळधार पावसाची नोंद झाली आहे.
शेतकऱ्यांसाठी दिलासा
मागील दोन दिवसांपासून पडत असलेल्या पावसामुळे शेतकऱ्यांना दिलासा मिळाला आहे. हा पाऊस सोयाबीन, तूर, मुग, उडीद आणि हळदीच्या पिकांसाठी उपयुक्त आहे.
मुंबईतही मुसळधार
मागील दोन दिवसांपासून मुंबईत विश्रांती घेतलेल्या पावसाने पुन्हा हजेरी लावली आहे. मुंबई शहराच्या तुलनेत उपनगरांत पावसाचा जोर सर्वाधिक आहे. मागील काही दिवसांपासून पावसाने उघडीप दिल्याने असह्य उकाडा मुंबईकरांना सहन करावा लागत होता. पावसाच्या पुनरागमनामुळे मुंबईकरांना दिलासा मिळाला आहे. हवामान विभागाच्या कुलाबा केंद्रात मंगळवारी २७.६ अंश सेल्सिअस तर, सांताक्रूझ केंद्रात ३०.१ अंश सेल्सिअस कमाल तापमानाची नोंद झाली.
पावसाचा अंदाज कुठे
अतिमुसळधार पावसाचा अंदाज
रत्नागिरी, रायगड, सिंधुदुर्ग, सातारा घाट परिसर, कोल्हापूर घाट परिसर
मुसळधार पावसाचा अंदाज
मुंबई, ठाणे, पालघर, नाशिक घाट परिसर
विजांसह मेघगर्जनेसह पावसाचा अंदाज
धुळे, नंदुरबार, जालना, परभणी, हिंगोली, नांदेड, भंडारा, चंद्रपूर, गडचिरोली, गोंदिया, नागपूर, यवतमाळ
