ब्रिटनमध्ये आढळलेल्या एक्सई या करोनाच्या नव्या उपप्रकाराने बाधित असलेला एक रुग्ण मुंबईत आढळला आहे. मुंबई पालिकेने नुकत्याच जाहीर केलेल्या जिनोम सिक्वेन्सिंगमध्ये हे निदर्शनास आले आहे. भारतातील हा एक्सईचा पहिलाच रुग्ण आहे. हा रुग्ण दक्षिण आफ्रिकेचा नागरिक आहे. दुसरीकडे केंद्रीय आरोग्य विभागाने मात्र मुंबईत एक्सईचा रुग्ण आढळल्याचे नाकारले आहे. रुग्णाचे जिनोम चाचणीचा अहवाल एक्सईच्या जिनोमनुसार नाहीत, असं त्यांनी म्हटलं आहे.
हा रुग्ण महिनभरापूर्वी म्हणजे २ मार्चला करोनाबाधित होता. त्याला कोणतीही लक्षणे नव्हती. दुसऱ्याच दिवशी म्हणजे ३ मार्चला करोनामुक्तही झाला. गेल्या महिनाभरात मुंबईत रुग्णसंख्या वाढलेली नाही. या उलट कमीच झालेली आहे. त्यामुळे याच्या विषाणूच्या प्रकाराचा प्रसार तीव्रतीने झालेला नाही आणि हा विषाणूचा प्रकार निश्चितच धोकादायक नाही, हे यावरून दिसून येते.
ही महिला वेशभूषाकार असून चित्रीकरणाच्या समूहामध्ये सहभागी असते. ही महिला फेब्रुवारीमध्ये दक्षिण आफ्रिकेहून भारतात आली होती. त्यावेळी तिला करोनाची बाधा झालेली नव्हती. परंतु चित्रीकरणामध्ये नियमितपणे केल्या जाणाऱ्या चाचण्यांमध्ये २ मार्चला ती बाधित आढळली. तिचे नमुने चाचणीसाठी पाठविले असता एक्सईची बाधा झाल्याचे आढळले आहे. ३ मार्चचला दिलेल्या नमुन्यामध्ये ही महिला करोनामुक्त झाल्याचेही आढळले आहे. या महिलेने लशीच्या दोन्ही मात्रा घेतलेल्या होत्या आणि ती लक्षणे विरहित होती.
बृहन्‍मुंबई महानगरपालिकेच्‍या कस्तुरबा रुग्णालयात स्थित नेक्स्ट जनरेशन जिनोम सिक्वेसिंग लॅब व पुणे स्थित राष्ट्रीय विषाणूविज्ञान संस्था यांच्या संयुक्त विद्यमाने या अकराव्या चाचणी तुकडीचा (बॅच) भाग म्हणून कोविड बाधा झालेल्या एकूण ३७६ रुग्णांच्या नमुन्यांची चाचणी करण्यात आली. यातील २३० रुग्ण हे मुंबई महानगरातील नागरिक आहेत. यात ‘ओमायक्रॉन’ चे २२८ अर्थात ९९.१३ टक्के रुग्ण आढळले आहेत. उरलेल्या दोन बाधितांपैकी एक जण ‘कापा’ उपप्रकाराने तर अन्य एक जण ‘एक्सई’ उपप्रकाराने बाधित होता, असे निष्पन्न झाले आहे.
‘ब्रिटनमध्ये एक्सई हा विषाणूचा उपप्रकार जानेवारीमध्ये आढळला आहे. जगभरात या विषाणूचे ६०० हून अधिक रुग्ण आढळले आहेत. हा विषाणू ओमायक्रॉनचे बीए.१ आणि बीए.१ या उपप्रकाराचे उत्परिवर्तन होऊन निर्माण झाला आहे. यामध्ये बीए.१ आणि बीए.२ जनुकीय घटकांचे मिश्रिण झाल्याचे आढळले आहे. बीए.१ आणि बीए.२ हे दोन्ही उपप्रकार देशभरात करोनाच्या तिसऱ्या लाटेपासून आढळत आहेत. त्यामुळे यांचेच गुणधर्म असलेल्या नव्या विषाणूपासून सध्या कोणताही धोका आहे असे वाटत नाही. तिसऱ्या लाटेमध्ये मोठ्या प्रमाणात लोकसंख्या बाधित झाल्यामुळे करोनाविरोधात नैसर्गिक प्रतिकारशक्ती निर्माण झाली आहे. त्यामुळे पुढील तीन महिने तरी भारताला विषाणूच्या नव्या प्रकाराचा धोका नाही’, असे मत करोना कृती दलाचे सदस्य डॉ. शशांक जोशी यांनी व्यक्त केले आहे.
कोविड विषाणू उपप्रकारानुसार या २३० बाधित रुग्णांचे वर्गीकरण पुढीलप्रमाणे आहे.
• ओमायक्रॉन – २२८ रुग्ण (९९.१३ टक्के)
• कापा व्हेरिअंट – १ रुग्ण (०.४३ टक्के)
• एक्सई व्हेरिअंट – १ रुग्ण (०.४३ टक्के)
केंद्रीय आरोग्य विभागाने मुंबईत एक्सईचा रुग्ण आढळल्याचे नाकारले
केंद्रीय आरोग्य विभागाने मुंबईत एक्सईचा रुग्ण आढळल्याचे नाकारले आहे. जिनोमच्या चाचण्यांचा अभ्यास करणारी इंडियन सार्स-सीओव्ही२ जिनोमिक्स कन्सॉर्रिटयम(आयएनएसएसीओजी) या संस्थेतील तज्ज्ञांच्या मते या रुग्णाचे जिनोम चाचणीचा अहवाल एक्सईच्या जिनोमनुसार नाहीत. त्यामुळे या रुग्णाला एक्सई या उपप्रकाराची बाधा झाली आहे, असे म्हणता येणार नाही, असे ही केंद्रीय आरोग्य विभागाने स्पष्ट केले आहे.
आयएनएसएसीओजीची संध्याकाळी बैठक झाली असून यामध्ये कस्तुरबा मध्यवर्ती प्रयोगशाळेच्या प्रमुख डॉ. जयंती शास्त्री सहभागी झाल्या होत्या. कस्तुरबा प्रयोगशाळेतील अहवालांचे विश्लेषण करण्यासाठी पुन्हा पाठविण्याची मागणी या बैठकीत केली आहे. त्यानुसार हे अहवाल पाठविले जाणार आहेत, असे मुंबई पालिका प्रशासनाने सांगितले आहे.
