मुंबई : गेल्या काही दिवसांपासून मुंबई महानगरपालिकेत दबक्या आवाजात चर्चा सुरू असलेल्या प्रकरणाचा आता स्फोट झाला आहे. एका अधिकाऱ्याला आयुक्त कार्यालयात सेवा निवृत्तीनंतरही विशेष कार्यकारी अधिकारी पदावर नियुक्त केल्यामुळे मुंबई महापालिकेतील सर्व अधिकाऱ्यांमध्ये संतापाचे वातावरण आहे. या विशेष कार्यकारी अधिकाऱ्याला हटवण्यासाठी पालिकेतील सर्व १५ उपायुक्त एकटवले असून त्यांनी एकत्र येऊन मुंबई महापालिका आयुक्त भूषण गगराणी यांना पत्र पाठवले आहे. या अधिकाऱ्याचा कालावधी डिसेंबर अखेरीस संपत आहे. त्यांना मुदतवाढ मिळू नये म्हणून पालिकेतील सर्व अधिकारी एकवटले आहेत.
मुंबई महापालिकेच्या आयुक्त कार्यालयाचे सह आयुक्त चंद्रशेखर चौरे १ जानेवारी २०२५ रोजी सेवा निवृत्त झाले होते. मात्र चौरे यांना मुंबई महापालिकेत आयुक्त कार्यालयातच विशेष कार्यकारी अधिकारी म्हणून नियुक्त करण्यात आले होते. त्यांच्या नियुक्तीमुळे मुंबई महापालिकेतील उपायुक्तांमध्ये नाराजी पसरली होती. चौरे यांना विशेष कार्यकारी अधिकारी म्हणून नियुक्त केल्यामुळे त्या पदासाठी पात्र असलेल्या अधिकाऱ्यांवर अन्याय झाल्याची भावना निर्माण झाली होती. त्यामुळे गेल्या तब्बल दहा महिन्यांपासून अधिकाऱ्यांमध्ये या विषयावर दबक्या आवाजात चर्चा सुरू होती. मात्र आता येत्या ३१ डिसेंबर रोजी चौरे यांचा एक वर्षाचा कालावधी संपणार आहे. त्यामुळे त्यांना पुन्हा मुदतवाढ मिळू नये म्हणून मुंबई महापालिकेतील उपायुक्त पदावरील सर्व अधिकारी एकवटले आहेत. या १५ उपायुक्तांनी एक खरमरीत पत्र लिहिले असून हे पत्र भूषण गगराणी आणि सामान्य प्रशासन विभागाचा कार्यभार असलेल्या अश्विनी जोशी यांना पाठवले आहे. या पत्राबाबत अधिकाऱ्यांनी प्रचंड गुप्तता पाळली होती.
दरम्यान, उपायुक्तांनी आयुक्तांना पत्र लिहिण्याआधी चौरे यांच्या हटवण्यासाठी बरेच प्रयत्न केले होते. सर्व अधिकाऱ्यांनी पालिका आयुक्तांची भेट घेण्याचाही प्रयत्न केला. मात्र त्याला आयुक्तांनी दाद दिली नाही, असे काही उपायुक्तांचे म्हणणे आहे. त्यामुळे उपायुक्तांमधील राग अधिकच उफाळून आला आहे. त्यानंतर सर्व उपायुक्तांनी प्रत्यक्ष चौरे यांची भेट घेऊन स्वत:हून राजीनामा द्यावा, अशीही विनंती केली. मात्र चौरे यांनी कोणाचेच न ऐकल्यामुळे हे प्रकरण अधिकच चिघळत गेले. त्यामुळे येत्या काळात पालिका आयुक्त विरुद्ध सर्व अधिकारी असे शीतयुद्ध पेटण्याची शक्यता आहे.
सहाय्यक आयुक्तांचाही पाठिंबा
मुंबई महापालिकेतील १५ उपायुक्तांच्या या हक्काच्या लढाईला सहाय्यक आयुक्तांनीही पाठिंबा दर्शवला आहे. आयुक्तांनी चौरे यांच्याबद्दल काहीही निर्णय घेतला नाही तर सहाय्यक आयुक्त देखील या लढाईत उतरणार आहेत. तसेच येत्या काळात या विषयाला राजकीय रंग येण्याचीही शक्यता आहे. चौरे यांचे पालिका आयुक्त कार्यालयात बस्तान बसले असून ते मनमानी कारभार करीत असल्याची अधिकाऱ्यांमध्ये चर्चा आहे.
यापूर्वीही तक्रारी
चौरे यांच्याविरोधात यापूर्वीही माहिती अधिकार कार्यकर्ते संतोष दौंडकर यांनीही तक्रारी केल्या होत्या. तसेच चौरे यांच्या नियुक्तीमुळे एका मागासवर्गीय अधिकाऱ्यांवर अन्याय होत असल्याची तक्रार माजी खासदार रामदास आठवले यांनीही केली होती.
दरम्यान, याबाबत पालिका आयुक्त भूषण गगराणी यांच्याशी संपर्क साधला असता त्यांनी बोलण्यास नकार दिला. तसेच चौरे यांच्याशी संपर्क साधण्याचा प्रयत्न केला असता त्यांनी प्रतिसाद दिला नाही.
