रेल्वेमार्गावरील महत्त्वपूर्ण अभियांत्रिकी कामासाठी नव्या वर्षांच्या पहिल्या रविवारीही मध्य, पश्चिम तसेच हार्बर मार्गावर मेगाब्लॉक घेण्यात येणार आहे. मेगाब्लॉकच्या काळात या तीनही मार्गावरील काही सेवा रद्द राहतील. तर इतर सेवा वेळापत्रकापेक्षा १५ ते २० मिनिटे उशिराने धावतील. तरी प्रचंड गर्दी असल्यास प्रवाशांनी जीव धोक्यात टाकून प्रवास करू नये, असे आवाहन रेल्वे प्रशासनाने केले आहे.
मध्य रेल्वे
कुठे – कल्याण ते ठाणे या स्थानकांदरम्यान अप धिम्या मार्गावर
कधी – सकाळी ११.१५ ते दुपारी ३.१५ वा.
परिणाम – ब्लॉकदरम्यान कल्याणहून मुंबईच्या दिशेने जाणाऱ्या धिम्या गाडय़ा अप जलद मार्गावर वळवण्यात येतील. या गाडय़ा कल्याण ते ठाणे यांदरम्यान ठाकुर्ली, कोपर, दिवा, मुंब्रा आणि कळवा या स्थानकांवर थांबणार नाहीत. ठाण्यापुढे या गाडय़ा पुन्हा धिम्या मार्गावर वळवण्यात येतील. त्याशिवाय अप जलद गाडय़ा त्यांच्या नेहमीच्या थांब्यांव्यतिरिक्त ठाणे, मुलुंड, भांडुप, विक्रोळी, घाटकोपर, कुर्ला या स्थानकांवरही थांबतील. तर डाऊन जलद गाडय़ाही त्यांच्या नेहमीच्या थांब्यांव्यतिरिक्त घाटकोपर, विक्रोळी, भांडुप आणि मुलुंड या स्थानकांवर थांबतील.
हार्बर मार्ग
कुठे – कुर्ला ते वाशी या स्थानकांदरम्यान अप-डाऊन मार्गावर
कधी – सकाळी ११.०० ते दुपारी ३.०० वा.
परिणाम – ब्लॉकदरम्यान कुर्ला ते वाशी या दरम्यान अप आणि डाऊन या दोन्ही मार्गावरील वाहतूक पूर्णपणे बंद राहील. त्यामुळे या दरम्यान मुंबई छत्रपती शिवाजी टर्मिनसहून वाशी, बेलापूर, नेरूळ आणि पनवेल या स्थानकांसाठी गाडय़ा रवाना होणार नाहीत. तसेच अप दिशेला येणाऱ्या गाडय़ाही रद्द असतील. प्रवाशांच्या सोयीसाठी मध्य रेल्वे मुंबई छत्रपती शिवाजी टर्मिनस ते कुर्ला आणि पनवेल ते वाशी यांदरम्यान विशेष सेवा चालवणार आहे. तसेच ब्लॉक दरम्यान हार्बर मार्गावरील प्रवाशांना अधिकृत तिकिटासह पश्चिम, ट्रान्स हार्बर आणि मुख्य मार्गावरून प्रवास करण्याची परवानगी देण्यात आली आहे.
पश्चिम रेल्वे
कुठे – सांताक्रूझ ते गोरेगाव यांदरम्यान अप व डाऊन जलद मार्गावर
कधी – सकाळी १०.३५ ते दुपारी ३.३५
परिणाम – ब्लॉकदरम्यान सांताक्रूझ ते गोरेगाव यांदरम्यान अप आणि डाऊन दिशांकडे जाणाऱ्या सर्व जलद गाडय़ा अप व डाऊन धिम्या मार्गावरून चालवल्या जातील.
