मुंबई : अंधेरी पश्चिम ते मंडाले मेट्रो २ ब मार्गिकेतील डायमंड गार्डन ते मंडाले अशा पहिल्या टप्प्याचे लोकार्पण बुधवारी पंतप्रधान नरेंद्र मोदी यांच्या हस्ते करण्याचे नियोजन राज्य सरकारचे आणि मुंबई महानगर प्रदेश विकास प्राधिकरणाचे (एमएमआरडीए)होते. त्यानुसार या टप्प्यासाठी सुरक्षा प्रमाणपत्र घेण्याची प्रक्रियेला वेग देण्यात आला होता. मात्र अद्याप सुरक्षा प्रमाणपत्र न मिळाल्याने लोकार्पणाचा बुधवारचा मुहुर्त अखेर चुकला आहे. बुधवारी मेट्रो ३ मार्गिकेतील आचार्य अत्रे चौक ते कफ परेड टप्प्याचेच लोकार्पण नरेंद्र मोदी यांच्या हस्ते होणार आहे. डायमंड गार्डनर ते मंडाले मेट्रो प्रवासासाठी मुंबईकरांनी आणखी काही दिवस प्रतीक्षा करावी लागणार आहे. एमएमआरडीएकडून लवकरच लोकार्पणासाठीची नवीन तारीख जाहिर केली जाण्याची शक्यता आहे.
दहिसर – अंधेरी पश्चिम मेट्रो २ अ चा विस्तार अंधेरी पश्चिम – मंडाले असा मेट्रो २ ब मार्गिकेच्या माध्यमातून करण्यात येत आहे. २२ किमी लांबीच्या आणि २२ मेट्रो स्थानकांचा समावेश असलेल्या या मार्गिकेचे काम दोन टप्प्यात करण्यात येत आहे. मंडाले – डायमंड गार्डन आणि डायमंड गार्डन – मंडाले असे हे दोन टप्पे आहेत. या दोन टप्प्यातील डायमंड गार्डन – मंडाले टप्पा डिसेंबरअखेरीस वाहतूक सेवेत दाखल करण्याचा निर्णय घेण्यात आला आहे. त्यानुसार या टप्प्यातील मार्गिकेच्या कामाला वेग देऊन एप्रिल २०२५ मध्ये डायमंड गार्डन – मंडालेदरम्यान मेट्रो गाड्यांच्या आणि विविध यंत्रणांच्या चाचण्यांना सुरुवात करण्यात आली आहे. आता चाचण्या अंतिम टप्प्यात असल्याने आॅक्टोबरच्या पहिल्या आठवड्यात मेट्रो आयुक्त, मेट्रो रेल्वे सुरक्षा (सीएमआरएस) यांच्याकडून सुरक्षा प्रमाणपत्र प्राप्त होईल अशी सरकार आणि एमएमआरडीएला अपेक्षा होती. त्यामुळेच नवी मुंबई विमानतळ आणि मेट्रो ३ मार्गिकेतील शेवटच्या टप्प्याच्या लोकार्पणाच्या दिवशीच अर्थात बुधवारी डायमंड गार्डन ते मंडाले टप्प्याचेही लोकार्पण करण्याची तयारी सुरु होती. मात्र अखेर या टप्प्यासाठी सुरक्षा प्रमाणपत्र प्राप्त न झाल्याने, अजूनही सीएमआरएसच्या पथकाकडून तपासणी, चाचण्या सुरु असल्याने या टप्प्याचे लोकार्पण लांबणीवर गेले आहे. याविषयी एमएमआरडीएकडे विचारणा केली असता सुरक्षा प्रमाणपत्राची प्रतीक्षा असल्याचे सांगण्यात आले. त्यामुळे आता डायमंड गार्डन ते मंडाले मेट्रो प्रवासाच्या लोकार्पणाच्या नवीन तारखेची प्रतीक्षा प्रवाशांना असणार आहे.
अशी आहे मेट्रो २ ब मार्गिका
दहिसर ते अंधेरी पश्चिम मेट्रो २ अ ला जोडणारी मेट्रो मार्गिका म्हणजे मेट्रो २ ब मार्गिका. २३ किमी लांबीची आणि २२ मेट्रो स्थानकांचा समावेश असलेल्या या मार्गिकेमुळे अंधेरी पश्चिम ते मंडाले असा प्रवास काही मिनिटांत करता येणार आहे. त्यामुळे ही मार्गिका मुंबईकरांच्यादृष्टीने अत्यंत महत्त्वाची ठरणार आहे. अंदाजे १० हजारांहून अधिक खर्चाच्या या मार्गिकेचे काम दोन टप्प्यात सुरु आहे. त्यातील पहिला टप्पा डायमंड गार्डन ते मंडाले आणि दुसरा टप्पा डायमंड गार्डन ते अंधेरी पश्चिम असा आहे. ही संपूर्ण उन्नत मेट्रो मार्गिका असून अनेक रेल्वे मार्ग ओलांडून ही मार्गिका जाते.तर या मार्गिकेतील कारशेड मंडाले येथील ३१ एकर जागेवर उभारण्यात आले आहे. या कारशेडमध्ये एकावेळेस ७२ मेट्रो गाड्या उभ्या करता येणार आहेत. डायमंड गार्डन ते मंडाले हा पहिला टप्पा ५.६ किमी लांबीचा असून त्यात मंडाले, मानखुर्द, बीएसएनएल,शिवाजी चौक आणि डायमंड गार्डन अशी स्थानके आहेत.
मुंबई १ स्मार्ट कार्डचे आज लोकार्पण आता एसटी, लोकल, बेस्ट बस, मेट्रो, मोनोसाठी एकच कार्ड
मुंबई महानगर प्रदेशातील प्रवासी उपनगरीय रेल्वे, लोकल, एसटी, बेस्ट बस, मेट्रो, मोनो अशा वाहतूक पर्यायांचा वापर करतात. मात्र या प्रवाशांना प्रत्येक प्रवासासाठी वेगवेगळे तिकीट किंवा कार्ड घ्यावे लागते. त्यात वेळ जातो आणि प्रवाशांचा त्रासही वाढतो. या पार्श्वभूमीवर राज्य सरकारने एकात्मिक तिकिट प्रणालीअंतर्गत एमएमआरडीएला मेट्रो, मोनो, रेल्वे, बेस्ट आणि एसटीसाठी एकच कार्ड तयार करण्याचे निर्देश दिले होते. त्यानुसार एमएमआरडीएकडून मुंबई १ स्मार्ट कार्ड आणि मुंबई १ अॅप तयार करण्यात आले आहे. या सेवेचे काम पूर्ण झाल्याने बुधवारी नरेंद्र मोदी यांच्या हस्ते या सेवेचे लोकार्पण करण्यात येणार असल्याची माहिती एमएमआरडीएकडून देण्यात आली आहे. लोकार्पणानंतर ही सुविधा प्रवाशांसाठी उपलब्ध होणार आहे. आता एकाच कार्डवरुन प्रवाशांना एसटी, लोकल, मेट्रो,मोनो,बेस्टने प्रवास करता येणार आहे. हे कार्ड नवी मुंबई, ठाणे,कल्याण-डोंबिवली, मिरा-भाईंदर आदी क्षेत्रातील सार्वजनिक वाहतूक व्यवस्थेसाठीही वापरता येणार आहे.
