‘ठाणे बंद’ला मनसे चा विरोध

लोकप्रतिनिधींवरही कारवाई करा- राज ठाकरे
अनधिकृत बांधकामांना अजिबात थारा देऊ नये. उलट अशी बांधकामे करणाऱ्या बिल्डरांबरोबरच त्यांना संरक्षण देणाऱ्या नगरसेवक, आमदारांवर कारवाई झाली पाहिजे, अशी रोखठोक भूमिका मांडत याप्रकरणी शिवसेना-राष्ट्रवादी काँग्रेसने पुकारलेल्या ‘ठाणे बंद’मध्ये आपला पक्ष सहभागी होणार नाही, असे ‘मनसे’प्रमुख राज ठाकरे यांनी बुधवारी जाहीर केले. मात्र, अनधिकृत इमारतींमध्ये राहणाऱ्या रहिवाशांची पर्यायी व्यवस्था करावी, अशी मागणीही त्यांनी केली. अनधिकृत बांधकामे नियमित करण्याच्या केंद्रीय कृषीमंत्री शरद पवारांच्या सूचनेवरही त्यांनी टीकास्त्र सोडले.
मुंब्रा येथील अनधिकृत इमारत पडून झालेल्या दुर्घटनेनंतर ठाण्यात प्रशासनाने अनधिकृत इमारतींवर कारवाईचा बडगा उगारला. त्यामुळे मतांच्या राजकारणात फटका बसण्याची चिन्हे दिसताच शिवसेना आणि राष्ट्रवादी काँग्रेसने एकत्र येऊन गुरुवारी ठाणे बंद पुकारला आहे. याबाबत मनसेची भूमिका काय याकडे साऱ्यांचे लक्ष लागलेले असताना बुधवारी सायंकाळी राज ठाकरे यांनी पत्रकार परिषद घेत अनधिकृत बांधकामे आणि त्यांना संरक्षण देणाऱ्यांवर जोरदार टीकास्त्र सोडले.
मनसेच्या लोकप्रतिनिधींनी अनधिकृत बांधकामांना संरक्षण दिले तर त्यांना पक्षातून काढून टाकण्यात येईल, असा सज्जड इशाराही त्यांनी दिला. मनसे आमदार रमेश पाटील यांनी अनधिकृत बांधकाम केले असेल तर तेही पाडले पाहिजे, अशी स्पष्ट भूमिका राज यांनी यावेळी मांडली. या बंदमध्ये मनसे सहभागी होणार नाही, ठाणेकरांनीही बंदला प्रतिसाद देऊ नये, असे आवाहन राज यांनी केले. अनधिकृत इमारतींच्या बांधकामापोटी ज्यांना चिरीमिरी मिळाली तेच आता त्या बांधकामांच्या संरक्षणासाठी सरसावले आहेत. अशा इमारतींमधील माणसे मेली तरी चालतील पण एक गठ्ठा मते शाबूत राहिली पाहिजेत, अशी त्यांची प्रवृत्ती आहे. अशा धोरणातूनच मोकळय़ा जागेवर झोपडय़ा वसवल्या जातात व नंतर तेथे ‘एसआरए’ राबवतात, अशा शब्दांत राज यांनी अवैध बांधकामांच्या संरक्षणासाठी सरसावलेल्या राजकारण्यांवर हल्ला चढवला. अनधिकृत बांधकामांना नियमित करण्याच्या शरद पवार यांच्या भूमिकेचाही राज यांनी कठोर शब्दांत समाचार घेतला. किती काळ अशी अनधिकृत बांधकामे नियमित करत राहणार. तसे असेल तर ‘आदर्श’ इमारतीबाबत इतका घोळ का घातला, असा सवाल करून ते म्हणाले की, दंड आकारून ती पण नियमित करून टाका. नियमित करण्याने अनधिकृत बांधकाम करणारे मोकाट सुटतील, शहरांचा विचका करून ठेवतील. त्यामुळे अनधिकृत बांधकामे अजिबात नियमित करू नये. ती पाडूनच टाकावीत, असे राज म्हणाले.