“नवाब मलिक डान्सबार चालवायचे, बांगलादेशमधून मुली आणून त्यांना वेश्या…”; पुरावे असल्याचं सांगत भाजपा नेत्याचा आरोप

मोहित कंबोज यांनी आज मुंबईमध्ये पत्रकार परिषद घेऊन धक्कादायक आरोप केले आहेत. आम्ही अनेक मुलींची स्टिंग ऑप्रेशन्स केली असून त्यामध्ये मुलींनी नवाब मलिकांनी आपल्याला जबरदस्तीने वेश्या व्यवसायामध्ये ढकलल्याची कबुली दिलीय. हे पुरावे आपण लवकरच तपास यंत्रणांकडे देणार असल्याचं कंबोज म्हणाले आहेत. कंबोज यांनी मलिक यांच्यावर गंभीर स्वरुपाचे आरोप केले आहेत.

मलिक यांना कुर्ल्यातील लोक आधी फार घाबरायचे. लोक या साऱ्या प्रकरणाबद्दल बोलायचा घाबरायचे. हे प्रकरण फार गंभीर असून मलिक यांचा वेश्या व्यवसाय, ड्रग्ज पेडलिंग आणि देशाविरोधी कारवायांशी संबंध असल्याचा दावा कंबोज यांनी केलाय. याच पार्श्वभूमीवर मुख्यमंत्री उद्धव ठाकरेंनी तात्काळ नवाब मलिक यांना राजीनामा देण्यास सांगावा, अशी मागणीही कंबोज यांनी केलीय.

नक्की वाचा >> ३०० कोटींची ‘ती’ जमीन, दाऊद, क्रिकेट सट्टा, हसिना पारकरसोबतची बैठक अन् अटक… मलिकांवर नेमका आरोप काय आहे?

ईडीच्या चौकशीमध्ये मलिक यांचे देशाविरोधात कारवाया करणाऱ्यांशी संबंध असल्याचं उघड झालं असून त्याबद्दलचे आर्थिक व्यवहारही समोर आलेत. तपास पुढे जाईल तसा अन्य यंत्रणाही यामध्ये सहभागी होतील आणि मोठ्या गोष्टींचा उलगडा होईल असा दावा कंबोज यांनी केलाय. कंबोज यांनी मलिक यांच्यासोबत त्यांच्या जावयावरही आरोप केलेत.

मलिकांच्या जवयाचे आंतरराष्ट्रीय ड्रग्ज पेडलर्सशी संबंध असल्याचं कंबोज म्हणालेत. मलिक यांनी टाडाच्या कलमाखाली गुन्हे दाखल असणाऱ्या आरोपीकडून मालमत्ता खरेदी केली. मलिक यांनी संविधानाच्या संरक्षणाची शपथ घेतली मात्र पदाचा दुरुपयोग केल्याचा दावा कंबोज यांनी केलाय. देशहितापेक्षा काहीही महत्वाचे नसल्याने यावरुन राजकारण करु नये असंही कंबोज म्हणालेत.