मुंबईः विधिमंडळ अधिवेशनात भाजप आमदार गोपीचंद पडळकर आणि शरद पवार गटाचे आमदार जितेंद्र आव्हाड यांच्या कार्यकर्त्यांमध्ये झालेला वाद पोलीस ठाण्यापर्यंत पोहोचला आहे. कार्यकर्त्याला ताब्यात घेतल्याच्या निषेधार्थ आव्हाड यांनी अन्य कार्यकर्त्यांसमवेत पोलिसांच्या वाहनासमोर ठिय्या आंदोलन केले होते. त्याप्रकरणी आता आव्हाड यांच्या विरोधातही पोलिसांनी गुन्हा दाखल केला आहे. आंदोलनाच्या वेळी पोलिसांनी बळाचा वापर करून वाहनासमोर बसलेले आव्हाड आणि कार्यकर्त्यांना बाजूला केले.
कार्यकर्ते नितीन देशमुख यांना पोलिसांनी ताब्यात घेतल्यानंतर आव्हाड यांनी त्याला विरोध केला. तासभर आव्हाड व त्यांचे कार्यकर्ते पोलिसांच्या गाडीसमोर बसून होते. यावेळी कार्यकर्त्याला नेऊ देणार नाही, असा पवित्रा आव्हाड यांनी घेतला होता. एकीकडे आव्हाड आणि त्यांचे कार्यकर्ते पोलिसांनी नितीन देशमुख यांना बसवलेल्या मोटरगाडी समोर आंदोलन करीत होते. पोलिसांनी अचानक गायकवाड यांना दुसऱ्या मोटरगाडीमध्ये बसवले. या गोंधळादरम्यान आव्हाड आणि त्यांचे कार्यकर्ते दुसऱ्या मोटरगाडी समोर आंदोलन करण्यासाठी उठले. त्यावेळी पोलिसांनी त्यांना रोखण्याचा प्रयत्न केला. दुसऱ्या गाडीच्या पुढील बाजूस आव्हाड यांनी स्वत:ला झोकून दिले.
पोलिसांची मोटरगाडी इंचभरही हलू देणार नाही अशी भूमिका घेत आव्हाड थेट मोटरगाडीच्या खाली घुसले. पण पोलिसांनी बळाचा वापर करून त्यांना उचलून तेथून बाजूला केले. त्यानंतर पोलिसांची मोटरगाडी तेथून निघून गेली. याप्रकरणी आता पोलिसांना अडवून आंदोलन केल्याप्रकरणी आव्हाड व इतर कार्यकर्त्यांविरोधातही मरिन ड्राईव्ह पोलीस ठाण्यात गुन्हा दाखल करण्यात आला आहे. आमदार जितेंद्र आव्हाड आणि आमदार गोपीचंद पडळकर यांच्या कार्यकर्त्यांमध्ये गुरुवारी विधान भवनामध्ये हाणामारी झाली. या हाणामारीवरून राजकीय वातावरण तापले असताना आव्हाड यांच्या कार्यकर्त्याला ताब्यात घेण्यावरूनही नाट्य रंगले.
आव्हाड यांची समाज माध्यमांवर पोस्ट
माझा कार्यकर्ता नितीन देशमुख यांना विधान भवनात मारहाण करण्यात आली. मारहाण करणारे पळून गेले आणि मार खाणाऱ्या कार्यकर्त्यालाच पोलिसांनी पकडले. सत्ताधाऱ्यांना इतके शरण गेलेले प्रशासन मी पाहिले नाही, असा आरोप आव्हाड यांनी समाज माध्यमांवर केला आहे.
