मुंबई : अल्पवयीन मुलाला मारहाण करून त्याला अश्लील कृत्य करण्यास भाग पाडून घटनेचे चित्रीकरण प्रसारीत केल्याच्या आरोपाखाली दोघांविरोधात गुन्हा दाखल करण्यात आला आहे. त्यातील अल्पवयीन आरोपीची डोंगरी बालसुधारगृहात रवानगी करण्यात आली आहे. याप्रकरणी दुसऱ्या आरोपाची शोध सुरू आहे.
पीडित मुलगा १६ वर्षांच्या असून त्याच्या वडिलांच्या तक्रारीवरून पोलिसांनी याप्रकरणी भारतीय न्याय संहिता कलम ११५(२), १२७(१), ३(५) सह बालकांचे लैंगिक अत्याचारापासून संरक्षण (पोक्सो) कायद्या अंतर्गत गुन्हा दाखल करण्यात आला आहे. तक्रारीनुसार, पीडित मुलाला आरोपी शॉपिंग सेंटरच्या गाळ्यात घेऊन गेले.
तेथे त्याला मारहाण केल्यानंतर आरोपींनी अश्लील कृत्त करण्यास सांगितले. त्याचे मोबाईलमध्ये चित्रीकरण केले. त्यानंतर आरोपींनी ते चित्रीकरण परिसरातील नागरिकांकडे प्रसारीत केले. त्याबाबतची माहिती कुटुंबियांना मिळाली असता त्यांनी याप्रकरणी मानखुर्द पोलिसांकडे तक्रार केली. त्यानुसार पोलिसांनी गुनहा दाखल केला व आरोपींचा शोध घेतले. त्यातील अल्पवयीन मुलाची डोंगरी बालसुधारगृहात रवानगी करण्यात आली आहे. याप्रकरणी पोलिसांनी घटनास्थळी भेट देऊन पाहणी केली. तसेच मोबाईल जप्त केला आहे. याप्रकरणी पोलीस अधिक तपास करत आहेत.
अल्पवयीन मुलांविरोधात घडलेल्या गुन्ह्यांमध्ये वाढ
मुंबईत अल्पवयीन मुले व मुली यांच्याविरोधात घडलेल्या लैंगिक अत्याचाराच्या घटनांमध्येही वाढ झाली आहे. मुंबईत २०२४ मध्ये बालकांचे लैंगिक अत्याचारापासून संरक्षण (पोक्सो) कायद्या अंतर्गत १३४१ गुन्ह्यांची नोंद झाली होती. २०२३ पोक्सो कायद्या अंतर्गत ११०८ गुन्ह्यांची नोंद झाली होती. २०२४ मध्ये मुंबईत पोक्सो कायद्या अंतर्गत दाखल गुन्ह्यांमध्ये ६०९ बलात्कार, ६६७ विनयभंग व ३५ छेडछाड-अश्लील शेरेबाजी केल्याच्या घटनांचा समावेश आहे. २०२३ मध्ये अल्पवयीन मुलींवरील गुन्ह्यांतील ९९ टक्के गुन्ह्यांची उकल करण्यात पोलिसांना यश आले होते. २०२४ मध्ये या प्रमाणात घट झाली असून २०२४ मध्ये हे प्रमाण ९६ टक्के होते. याशिवाय विनयभंग व छेडछाड-अश्लील शेरेबाजी या गुन्ह्यांच्या उकल होण्याच्या प्रमाणही अनुक्रमे १०० टक्क्यांवरून ९७ टक्के व ९६ टक्क्यांवरून ९१ टक्क्यांपर्यंत घटले आहे. अल्पवयीन मुलांच्या अत्याचाराच्या घटनांमध्ये बहुसंख्य आरोपी परिचीत व्यक्त आहेत.
