मुंबई : उत्पन्नाचा नवा स्त्रोत निर्माण करण्याच्या हेतूने राज्य परिवहन (एसटी) महामंडळाने राज्यभरात स्वतःच्या जागेवर २५० हून अधिक ठिकाणी व्यावसायिक तत्त्वावर पेट्रोल, डिझेलबरोबरच आता सीएनजी आणि विद्युत प्रभारण (चार्जिंग) केंद्र असलेले किरकोळ विक्री पंप सुरू करण्यात येणार आहेत. प्रत्येक आगारात इंधन विक्रीसाठी ४० बाय ३० मीटर जागा निश्चित करण्यात आली आहे.
मुंबई सेंट्रल येथील एसटी महामंडळाच्या मुख्यालयात नुकताच परिवहन मंत्री तथा एसटी महामंडळाचे अध्यक्ष प्रताप सरनाईक, एसटी महामंडळाचे उपाध्यक्ष व व्यवस्थापकीय संचालक डॉ. माधव कुसेकर, आर्थिक सल्लागार व मुख्य लेखा अधिकारी गिरीश देशमुख व सर्व खाते प्रमुख यांची बैठक पार पडली. या बैठकीत सरनाईक म्हणाले की, एसटी महामंडळाची आर्थिक स्थिती अत्यंत नाजूक आहे. अशा परिस्थितीमध्ये केवळ प्रवासी तिकीट विक्रीतून मिळणाऱ्या महसुलावर अवलंबून राहणे योग्य नाही. त्यासाठी उत्पन्नाचे नवे स्त्रोत निर्माण करणे गरजेचे आहे.
गेल्या ७० वर्षांपेक्षा अधिक काळ एसटी महामंडळ इंडियन ऑइल आणि भारत पेट्रोलियम या सार्वजनिक क्षेत्रातील कंपन्यांकडून डिझेल विकत घेत आहे. सध्या २५१ ठिकाणी एसटीच्या स्वतः च्या जागेवर पेट्रोल पंप उभारले असून याद्वारे केवळ एसटीच्या बससाठी डिझेल इंधनाचे वितरण होते. अर्थात, पेट्रोल पंप चालवणे आणि त्याचे देखभाल करण्याचा उत्तम अनुभव एसटी महामंडळाला आहे. त्यामुळे भविष्यात सर्वसामान्य ग्राहकांसाठी पेट्रोल, डिझेल, सीएनजी या पारंपरिक इंधन विक्रीसह विद्युत प्रभारण केंद्र असलेले पंप उभारणे प्रस्तावित आहे. समुच्चय इंधन विक्री पंप हे रस्त्यालगत व व्यावसायिकदृष्ट्या मोक्याच्या ठिकाणी असणे आवश्यक आहे. त्यानुसार राज्यभरातील एसटी महामंडळाने स्वतःच्या जागांचे सर्वेक्षण करण्यात आले असून यासाठी २५० हून अधिक ठिकाणी ४० बाय ३० मीटर जागा निश्चित करण्यात आली आहे. या ठिकाणी एसटी महामंडळाचे केवळ इंधन विक्रीच नाही, तर किरकोळ दुकानेही उभारण्यात येणार आहेत. त्यामुळे इतर व्यवसायालाही पूरक संधी उपलब्ध होईल. यातून एसटी महामंडळाला सार्वजनिक खासगी भागीदारीतून चांगला महसूलही मिळू शकेल, असे सरनाईक म्हणाले.
खुल्या निविदा प्रक्रियेच्या माध्यमातून इंडियन ऑइल, भारत पेट्रोलियम आणि हिंदुस्तान पेट्रोलियम या सार्वजनिक क्षेत्रातील कंपन्याबरोबर देशातील नव्हे, तर जगभरातील इंधन विक्री करणाऱ्या नामांकित कंपनांना एसटी महामंडळाच्या सुमारे २५० पेक्षा जास्त जागांवर व्यवसायिक तत्वावर समुच्चय इंधन विक्री केंद्र उभे करण्यासाठी निमंत्रित केले आहे. इथे एसटी महामंडळाला स्वतःच्या बससाठी इंधन भरण्याची सोय असेल. यासह सर्वसामान्य ग्राहकालाही किरकोळ इंधन विक्री करणे शक्य होईल, अशा पद्धतीचे ‘पेट्रो-मोटेल हबट’ उभा करण्याचा मानस आहे. भविष्यात सर्वसामान्य ग्राहकाला एसटी महामंडळाच्या माध्यमातून इंधन विक्री केंद्र उपलब्ध होईल. तसेच महामंडळाला उत्पन्नाचा नवा स्त्रोत निर्माण होईल, असे सरनाईक यांनी सांगितले.
