मुंबई : मुंबईतील रेल्वे स्थानकांची ब्रिटीशकालीन नावे बदलण्याच्या हालचाली शासन दरबारी सुरू झाल्या आहेत. करी रोड, सॅन्डहर्स्ट रोड, परळ अशा आठ ते १० स्थानकांच्या नामांतराचा प्रस्ताव राज्य सरकारने तयार केला आहे. तो आज, बुधवारी मंत्रिमंडळ बैठकीत मांडण्यात येणार आहे. चर्चगेट स्थानकाला दिवंगत शिवसेनाप्रमुख बाळासाहेब ठाकरे यांचे नाव देण्याचा प्रस्ताव असला, तरी त्याबाबत संभ्रम असल्याची माहिती सूत्रांनी दिली.
हेही वाचा >>> मोदींच्या हस्ते हजारो कोटींच्या रेल्वे प्रकल्पांची पायाभरणी
खासदार राहुल शेवाळे यांनी मुंबईतील उपनगरी रेल्वे स्थानकांची ब्रिटीशकालीन नावे बदण्याची मागणी मुख्यमंत्री एकनाथ शिंदे यांच्याकडे केली होती. त्यानुसार मंगळवारी झालेल्या बैठकीत स्थानकांच्या नामांतराबाबत चर्चा झाली. चर्चगेट स्थानकाला शिवसेनाप्रमुख बाळासाहेब ठाकरे यांचे तर वांद्रे टर्मिनसला डॉ. बाबासाहेब आंबेडकर यांचे नाव देण्याबाबतही चर्चा झाली. मात्र पुनर्नांमाकन करताना केवळ राष्ट्रीय पुरुषांचा आदर दाखविण्यासाठी किंवा भाषाविषयक स्थानिक लोकांच्या भावनांचे समाधान व्हावे म्हणून नामांतर करू नये, असा केंद्राचा नियम आहे. त्यामुळे ठाकरे यांचे देता येणार नाही याकडे लक्ष वेधण्यात आले. असे असले तरी मंत्रिमंडळ बैठकीत ठाकरे यांच्या नावाची शिफारस केली जाऊ शकते.
दादर स्थानकाला डॉ. बाबासाहेब आंबेडकर यांचे नाव देण्याची मागणी विविध संघटनांकडून वारंवार केली जाते. मात्र त्याऐवजी परळ टर्मिनसला डॉ. आंबेडकर यांचे नाव देण्याचा प्रस्ताव आहे. बुधवारी मंत्रिमंडळ बैठकीत प्रस्तावास मान्यता मिळाल्यानंतर तो केंद्रीय गृहमंत्रालयाकडे पाठविण्यात येणार असून त्यांच्या मान्यतेनंतर रेल्वे मंत्रालय स्थानकांच्या नामांतराची प्रक्रिया पूर्ण करेल. मुंबई सेंट्रल टर्मिनसचा नामविस्तार नाना शंकरशेठ मुंबई सेंट्रल टर्मिनस असा करण्याचा निर्णय १२ मार्च २०२० रोजी मंत्रिमंडळ बैठकीत घेण्यात आला असून जुलै २०२०मध्ये तो पुढील कार्यवाहीसाठी केंद्रीय गृहमंत्रालयाकडे पाठविण्यात आला होता
मध्य रेल्वे
करी रोड ●लालबाग
सॅन्डहर्स्ट रोड ●डोंगरी
पश्चिम रेल्वे
मरीन लाईन्स ●मुंबादेवी
चर्नी रोड ●गिरगांव
ग्रँटरोड ●गावदेवी
हार्बर रेल्वे
कॉटन ग्रीन ●काळाचौकी
रे रोड ●घोडपदेव
डॉकयार्ड ●माझगाव
किंग सर्कल ●तीर्थंकर पार्श्वनाथ
