मुंबई: बेस्ट बसच्या अपघातात दोन प्रवाशांचा मृत्यू

मुंबई: पूर्व द्रुतगती महामार्गाच्या गोरेगाव चेक नाका पुलावर बेस्टच्या दोन बस आणि एक रिक्षा यांच्यात झालेल्या भीषण अपघातात दोघांना आपला जीव गमवावा लागल्याची घटना शनिवारी रात्री घडली. यात जॉनी संखाराम ( ४२) आणि सुजाता पंचकी (३८) अशी मृतांची नावे आहेत.

पोईसर बस आगारातून बस क्रमांक १४५३ (एमएच ०१ एपी ०२२६) आणि बस क्रमांक १८६२ (एमएच ०१ एपी ०७४६) या दोन्ही बस शनिवारी रात्री आगार हस्तांतरणासाठी घाटकोपर आगारात जात होत्या. बस क्रमांक १४५३ संतोष देवूलकर (५३) हे चालवत होते, तर बस क्रमांक १८६२ संतोष घोंगे (४५) हे चालवत होते. साधारणत रात्री १.४५ च्या सुमारास गोरेगाव चेक नाका पुलावर दोन्ही बस आल्या असता, बस क्रमांक १८६२ च्या चालकाने ब्रेक लावले. तसेच बस क्रमांक १४५३ च्या चालकानेही तसेच केले. मात्र मुसळधार पावसामुळे रस्ता निसरडा झाल्याने बस क्रमांक १४५३ बस घसरली आणि बस क्रमांक १८६२ बसगाडीला आणि नंतर रिक्षाला धडकली.

आणखी वाचा-म्हाडा मुंबई मंडळ सोडत २०२३: लवकरच अर्जांची एक लाखाच्या घरात, अनामत रक्कमेसह ७२ हजार अर्ज दाखल

रिक्षातील प्रवासी जॉनी संखाराम आणि सुजाता पंचकी हे प्रवासी गंभीर जखमी झाले. पोलिसांनी त्यांना तातडीने ट्रॉमा केअर रुग्णालयात दाखल केले. जॉनी संखाराम यांना दाखल करण्यापूर्वीच मृत्यू झाल्याचे डॉक्टरांनी सांगितले. सुजाता पंचकी यांना अंधेरीतील कोकिलाबेन रुग्णालयात हलवण्यात आले. तिथे रात्री ३:४५ वाजता डॉक्टरांनी त्यांना मृत घोषित केले. रिक्षा चालकाच्या डाव्या गालाला किरकोळ दुखापत झाली असून त्याच्यावर सध्या वैद्यकीय उपचार सुरू आहेत. अपघाताचे नेमके कारण शोधण्यासाठी अधिकारी सखोल तपास करत आहेत, अशी माहिती बेस्ट उपक्रमाच्या अधिकाऱ्यांनी दिली.