केंद्रीय अर्थराज्यमंत्र्यांचा म्हाडाच्या घरासाठी अर्ज

केंद्रीय अर्थराज्यमंत्री भागवत कराड यांनी संकेत क्रमांक ४७० मधील उच्च उत्पन्न गटातील घरासाठी अर्ज केला आहे. ताडदेवमधील क्रीसेंट टॉवरमधील १४२.३० चौ. मीटर क्षेत्रफळाचे हे घर असून, या घराची किंमत सात कोटी ५७ लाख ९४ हजार २६७ रुपये आहे. या घरासाठी आपण अर्ज केल्याचे भागवत कराड यांनी ‘लोकसत्ता’शी बोलताना सांगितले. मात्र, याबाबत अधिक काही बोलण्यास त्यांनी नकार दिला. बदनापूरचे आमदार नारायण कुचे यांनीही या घरासाठी सर्वसाधारण गटातून आणि लोकप्रतिनिधी गटातून अर्ज (दोन अर्ज) केले आहेत.

कुचे यांनी एकूण पाच अर्ज दाखल केले आहेत. त्यानुसार क्रीसेंट टॉवरमधील संकेत क्रमांक ४६९ मधील सात कोटी ५२ लाख ६१ हजार ६३१ रुपये किमतीच्या घरासाठी दोन अर्ज केले असून, एक अर्ज याच टॉवरमधील पाच कोटी ९३ लाख रुपये किमतीच्या घरासाठी आहे. पाचपैकी केवळ एक अर्ज लोकप्रतिनिधी प्रवर्गातून करण्यात आला आहे. माजी आमदार हिरामण वरखड यांनी तीन अर्ज केले असून, ते सर्व अर्ज अल्प उत्पन्न गटातील घरासाठी आहेत. आमदार आमश्या पाडवी यांनीही अल्प गटातील घरासाठी अर्ज केला आहे.

लोकप्रतिनिधींसाठीचे आरक्षण रद्द करण्याचा प्रस्ताव अनिर्णित

म्हाडाच्या सोडतीत सामाजिक आरक्षणासह विविध प्रवर्गासाठीही आरक्षण आहे. त्यानुसार आजी-माजी खासदार, आमदारांसाठी दोन टक्के आरक्षण आहे. अगदी अत्यल्प, अल्प, मध्यम आणि उच्च अशा सर्व उत्पन्न गटात हे आरक्षण आहे. मात्र, लोकप्रतिनिधींचे उत्पन्न पाहता ते अत्यल्प गटात बसत नाहीत. त्यामुळे गेल्या काही वर्षांपासून अत्यल्प आणि अल्प गटातील घरे अर्जाविना रिकामी राहत आहेत. ही घरे विकली जात नसल्याने लोकप्रतिनिधींना सोडतीत आरक्षण कशाला, असा प्रश्न उपस्थित करून त्यांचे आरक्षण रद्द करण्याची मागणी होत आहे. म्हाडाने प्रतिसाद न मिळालेली घरे सर्वसाधारण प्रवर्गाकडे वर्ग करण्याचा निर्णय घेत त्याची अंमलबजावणीही सुरू केली. मात्र, त्यानंतरही लोकप्रतिनिधींसाठीचे आरक्षण रद्द करण्याच्या मागणीने जोर धरला आहे. त्यामुळे अखेर म्हाडाच्या मुंबई मंडळाने लोकप्रतिनिधींचे अत्यल्प गटातील आरक्षण रद्द करण्याचा प्रस्ताव राज्य सरकारकडे सादर केला असून, तो मंजुरीच्या प्रतीक्षेत आहे. अत्यल्प आणि अल्प गटासाठी लोकप्रतिनिधींचे अर्ज येत नसले तरी यंदाच्या सोडतीतील मध्यम आणि उच्च गटासाठीच्या घरांसाठी लोकप्रतिनिधींचा चांगला प्रतिसाद मिळाला आहे.

साडेसात कोटींचे घर

केंद्रीय अर्थराज्यमंत्री भागवत कराड यांनी ताडदेवमधील क्रीसेंट टॉवरमधील उच्च उत्पन्न गटातील घरासाठी अर्ज केला आहे. हे घर १४२.३० चौ. मीटर क्षेत्रफळाचे असून, त्याची किंमत सात कोटी ५७ लाख ९४ हजार २६७ रुपये आहे.